"Prezident İlham Əliyevin imzaladığı son əfv fərmanı da Azərbaycanda siyasi məhbuslar problemini həll etmir". "Turan"ın məlumatına görə, azərbaycanlı hüquq müdafiəçiləri bu fikirdədir.
Qanunçuluq və İnsan Hüquqlarına Riayət Edilməsi Bürosunun rəhbəri Səidə Qocamanlı deyib ki, hüquq müdafiə təşkilatlarının monitorinq qrupunun siyahısından üç nəfər - Rövşən Yusifov (keçmiş baş nazir Surət Hüseynovun işi üzrə keçib) və XTPD-nin keçmiş iki üzvü - Rövşən Əliyev və Mənsur Quliyev əfv olunub. Onların hər ikisi bir neçə il əvvəl 1990-cı illər hadisələrinə bağlılıqda ittiham olunaraq həbs ediliblər.
Jurnalist Eynulla Fətullayevin siyahıya daxil edilmədiyinə gəlincə, S.Qocamanlı ümidvar olduğunu bildirib ki, Fətullayevin adı Novruz bayramında əfv olunacaq şəxslərin siyahısında olacaq. Qocamanlının sözlərinə görə, həbsxanalarda hələ daha 20 siyasi məhbus var.
Neftçilərin Hüquqlarını Müdafiə Komitəsinin rəhbəri Mirvari Qəhrəmanlı isə deyib ki, indiki fərman siyasi məhbuslar problemini həll etmədi. Onun fikrincə, "qızıl amnistiya" elan etməklə problemi köklü həll etmək olar. "Bu zaman təkcə siyasi məhbusları deyil, səhv iş tutan digərlərini də azad etmək olardı", - deyə M.Qəhrəmanlı vurğulayıb.
Sülh və Demokratiya İnstitutunun direktoru Leyla Yunus bildirib ki, Hüquq Müdafiə Təşkilatları Federasiyasının siyahısından yalnız bir siyasi məhbus - Rövşən Əliyev azad edilib. Həbsxanalarda ən azı 50 siyasi məhbus da var.
L.Yunus təəssüflə bildirib ki, əfv olunanlar arasında mübahisəsiz siyasi məhbuslar - Ruslan Bəşirli və Eynulla Fətullayev yoxdur. "Bəşirli 7 illik cəza müddətinin 5 ildən çoxunu çəkib. Fətullayev isə Avropa İnsan Hüquqları Məhkəməsinin qərarına zidd olaraq həbsdə saxlanır", - deyə qeyd edən L.Yunus siyasi məhbusların sayına gəlincə, deyib ki, onların sayı azalmır, çünki əfv olunan və cəzasını çəkənlərin yerinə yeniləri gəlir.
Qeyd edək ki, dekabrın 29-da prezident İlham Əliyev 92 məhbusun əfv olunması barədə fərman imzalayıb. Fərmana əsasən, 71 nəfər həbs cəzasından azad edilib. Bir məhbus şərti cəzadan azad edilib.
Eyni zamanda, azadlığın məhdudlaşdırılması kimi cəza çəkən 15 nəfər əfv edilib. Daha 5 nəfər isə pul cəriməsindən azad olunub.
Azad olunanlar arasında 4 nəfər Banqladeş, 2 Pakistan, 2 Əfqanıstan vətəndaşı var. Əfv olunanların arasında siyasi məhbus yoxdur. Onların əksəriyyəti 2008-2009-cu illərdə mühakimə edilənlərdir.
|
