Müxtəlif ölkələrdə işləyən azərbaycanlı jurnalistləri ilk dəfə olaraq Dam.az (Dünya Azərbaycan Mediası) saytı bir araya gətirdi. "Yeni Nəsil" Jurnalistlər Birliyinin təşəbbüsü ilə yaradılan bu saytın əsas məqsədi dünya ölkələrinin media qurumlarında səlahiyyət sahibi olan azərbaycanlı jurnalistləri vahid kommunikasiya şəbəkəsində birləşdirmək idi.
Dam.az saytının yaratdığı jurnalist şəbəkəsinin özəyini dünya azərbaycanlılarının qurduğu, yaxud mühüm mövqe tutduqları media vasitələri təşkil edir. Onlar sırasında müstəqil jurnalist kimi fəaliyyət göstərənləri də az deyil. Saytın yaradılmasına hazırlıq prosesi zamanı dünya ölkələrində fəaliyyət göstərən Azərbaycan media vasitələri müəyyənləşdirilib və onların vahid xəritəsi yaradılıb. İlk olaraq xaricdəki azərbaycanlı media mənsubları və jurnalistlər barədə Diaspor ilə iş üzrə komitənin, jurnalist təşkilatlarının malik olduqları informasiya toplanıb. Nəticədə 450 ünvanlıq bir siyahı alınıb. Lakin sonradan bəlli oldu ki, bu ünvanların 55 faizi artıq mövcud deyil.
Hazırda Dam.az saytında "Xaricdəki azərbaycanlı media mənsublarının və jurnalistlərin informasiya bankı" yaradılıb. Bu məlumatlara çıxmaq üçün Dam.az saytındakı xəritədə istənilən ölkənin üzərinə basmaq lazımdır. Burada 27 ölkədə azərbaycanlılar tərəfindən idarə olunan 64 KİV və 40 fəal azərbaycanlı jurnalist barədə informasiya daxil edilib. Ümumilikdə isə şəbəkəyə 300-ə yaxın media mənsubunun məlumatları daxil edilib. Xəritədəki məlumatlar daim yenilənir.
Dam.az-ın şəbəkəsində birləşən azərbaycanlı jurnalistlər hər ay saytın təşkil etdiyi forumların mövzusu ilə bağlı müzakirələr aparırlar. Sayta dünyada yaşayan azərbaycanlılar üçün maraqlı ola biləcək informasiyalar yerləşdirilir. Bundan əlavə, hər həftə tanınmış ictimai, siyasi xadim saytın qonağı olur və onlardan alınan video-müsahibələr sayta yerləşdirilir. Bu vaxta qədər millət vəkili Rasim Musabəyov, siyasi xadim Eldar Namazov, politoloq Hikmət Hacızadə, QHT-lərə Dövlət Dəstəyi Şurasının rəhbəri Azay Quliyevlə video müsahibələr qoyulub. Avrointeqrasiya məsələləri üzrə ekspert Vahid Qazi, Milli QHT Forumunun prezidenti Rauf Zeyni, İsveçdə yaşayan soydaşımız, tanınmış rejissor Rahim Sadıqbəyli ilə video müsahibələr sayt izləyiciləri tərəfindən daha çox maraqla qarşılanıb. Dam.az-da azərbaycanlı jurnalistlərin xaricə səfərlərinə dair fotomateriallar yenilənir.
|
