Görkəmli tarixçi alim, akademik Cəmil Quliyev dekabrın 27-də 83 yaşında vəfat edib. Mərhumla vida mərasimi onun bir zamanlar çalışdığı Azərbaycan Ensiklopediyasının binasında keçirildi. Vida mərasimində çıxış edən AMEA prezidenti Mahmud Kərimov onun vəfatını Azərbaycan elmi üçün ağır itki adlandırıb. M.Kərimov C.Quliyevin Azərbaycan elminə xidmətlərindən danışıb və onun həyat yolundan söz açıb.
AMEA Tarix İnstitutunun direktoru Yaqub Mahmudov isə Cəmil Quliyevin mərd insan olduğunu və heç bir çətinlikdən qorxmadığını bildirib: "Onun Azərbaycan elmi üçün xidmətləri danılmazdır. Bu gün hər birimiz onunla son dəfə görüşürük. Cəmil Quliyev insanlığı ilə də hər zaman öndə olmağı bacarıb. Bu gün tək Azərbaycan elmi üçün deyil, bütün xalqımız üçün ağır bir gündür". Vida mərasimi başa çatdıqdan sonra mərhum II Fəxri Xiyabanda dəfn olunub.
Cəmil Bahadur oğlu Quliyev 1927-ci ildə Şuşa şəhərində anadan olub. M.V.Lomonosov adına Moskva Dövlət Universitetinin tarix fakültəsində təhsil alıb. 100-dən çox elmi əsəri nəşr olunub. Bakı Dövlət Universitetinin müəllimi, professoru (1952-1972), rektoru (1989-1990), Partiya Tarixi İnstitutunda elmi işlər üzrə direktor müavini (1958-1972), Azərbaycan SSR EA-nın Tarix İnstitutunun direktoru (eyni zamanda Azərbaycan Sovet Ensiklopediyasının baş redaktoru və EA vitse-prezidenti vəzifəsini icra edən (1972-1978), Azərbaycan SSR EA-nın vitse-prezidenti (1981-1990), AMEA-nın İctimai Elmlər Bölməsinin akademik-katibi (1997-2001), "Naxçıvan Ensiklopediyası"nın redaktoru (1999-2002), AMEA Rəyasət Heyətinin üzvü (2001-2007) olub.
1972-ci ildə EA-nın müxbir üzvü, 1980-ci ildə isə hüquqi üzvü seçilib. Tarix elmləri doktoru, professor, dövlət mükafatı laureatı (1974), əməkdar elm xadimi (1979) idi. "Şöhrət" ordeni ilə təltif edilib (2000).
|
