Yeni ilin ilk ayında Türkiyənin Qaradəniz sahili Samsun şəhərində yerli Opera Teatrında Cüzeppe Verdinin "Karmen" operası nümayiş olunacaq. Operada əsas partiya olan Karmeni Azərbaycan Dövlət Opera və Balet Teatrının solisti, əməkdar artist Fidan Hacıyeva ifa edəcək. Fidan Hacıyeva deyir ki, operanın yanvarın 8-də nümayiş olunacağı gözlənir. Fidan Hacıyevadan başqa, digər partiyaları yerli vokalçılar ifa edəcəklər.
"Mənim ağ göyərçinim" yeni versiyada
Gənc Tamaşaçılar Teatrında "Mənim ağ göyərçinim" tamaşasının premyerası keçirilib. Teatrın mətbuat xidmətindən bildirilib ki, yazıçı-dramaturq Tamara Vəliyevanın eyniadlı pyesi əsasında hazırlanan tamaşanın yeni səhnə versiyasının müəllifi və quruluşçu rejissoru xalq artisti Cənnət Səlimovadır. Tərtibatçı - Gürcüstanın tanınmış rəssamı, Tumanişvili adına Teatrın baş rəssamı Şota Qlurjidzedir. Tamaşanın plastik həlli və rəqslərin quruluşu Vüsal Mehrəliyev, musiqi tərtibatı isə Vladimir Neverova məxsusdur.
20 Yanvar faciəsi qurbanlarına həsr edilən tamaşada sənədli kino-xronika materiallarından, müasir səhnə texnologiyalarından istifadə edilib.
"Yeni il karnavalı"
Gənc Tamaşaçılar Teatrı kiçik yaşlı tamaşaçılar üçün bayram şənliyi hazırlayıb. Teatrın mətbuat xidmətindən bildirilib ki, yanvarın 1-dən 5-nə kimi teatrın azyaşlı izləyiciləri "Yeni il karnavalı"nın iştirakçısı olmaq şansı qazanacaqlar. "Yeni il karnavalı" bu günlər ərzində saat 10, 12 , 14 və 16-da keçiriləcək.
|
