Azərbaycan məktəblərində şagirdlər məktəbli formasında olmalıdır. Dünyəvi dövlətlərin hamısında bu qayda mövcuddur və bu - normaldır. Bizdə bu qayda sovet dönəmində də vardı və son üç ildə yenidən - aradakı müəyyən fasilədən sonra - bu qaydaya qayıdılmışdır. Əlbəttə, bu doğru bir addımdır. Amma son zamanlar müəyyən şəxslər bu qaydaya qarşı çıxmaqdadırlar. Müəyyən media orqanları da onların dəyirmanına su tökür. İş hətta İran mollalarının da diqqətini cəlb edib və onlar ictimai çıxışlarında ölkəmizin ünvanına yersiz ifadələrə yol verib, daxili işlərimizə qarışmağa cəhdlər ediblər. Təhsil naziri Misir Mərdanov birbaşa olmasa da, bu kimi cəhdlərə, nəhayət, qəti cavab verib:
"Hicabla bağlı qəbul olunmuş qərar yerinə yetiriləcək. Heç kəs buna şübhə etməsin". Təhsil naziri bu sözləri İran ruhanisi ayətulla Nasir Mikarim Şirazinin Azərbaycan orta ümumtəhsil məktəblərində hicab məsələsi ilə bağlı fikirlərinə münasibət bildirərkən jurnalistlərə açıqlamasında deyib (APA).
Nazir vətəndaşları Azərbaycan qanunlarına hörmət etməyə çağırıb: "Biz hamını buna dəvət edirik. Əminəm ki, işimiz uğurlu olacaq. Bu iş heç kəsə, o cümlədən İslam dininə qarşı qoyulmayıb. Mən bunu məsuliyyət hissi ilə deyirəm".
Söhbət iranlı din adamı Nasir Mikarim Şirazinin bu günlərdə söylədiyi təhrikedici, ölkəmizin daxili işlərinə qarışan, hörmət gözlənilməyən mülahizələrindən gedir. Şirazi deyib: "Əhali dinc yollarla İslama zidd göstəriş və qərara müqavimət göstərsin və müsəlman ölkəsində İslam müqəddəslərinə qarşı çıxılmasına icazə verməsin. Qeyrətli Azərbaycan əhalisi düzgün olmayan belə bir göstərişlə razılaşmamalıdır. Azərbaycanın möhtərəm rəsmilərinə də məsləhətdir ki, əcnəbilərin təhrikinə aldanmayıb (?!) öz insanlarının səsini eşitsinlər".
İran ruhaniləri unudurlar ki, Azərbaycan dünyəvi dövlətdir, din dövlətdən ayrıdır, dini inanc insanların vicdan işidir və bu dövlət şəriət qanunları ilə deyil, dünyəvi qanunlarla idarə edilir. Azərbaycan rəsmilərinin ünvanına onun fikirlərində yer alan "əcnəbilərin təhrikinə aldanma" kimi mülahizə isə tamamilə yersizdir və hətta təhqiramizdir. Azərbaycan müstəqil dövlətdir, daxili və xarici siyasətini özü müstəqil müəyyənləşdirir və biz bilən, Azərbaycanın qərar qəbul edən rəsmiləri kifayət qədər iradəli adamlardır və hansısa mifik əcnəbilərin məsləhəti ilə oturub-durmurlar. İranda nüfuz sahibi olan Şirazi və digərlərinə isə söyləmək istəyirik ki, Azərbaycanda mövcud olmayan "hicab problemi" sarıdan qətiyyən narahat olmasınlar. Bunu özü üçün məsləhət bilənlərə qadağan yoxdur. Sadəcə, orta ümumtəhsil məktəbləri üçün müəyyən edilmiş forma var və ona əməl edilməlidir və ediləcək.
Təhsil Naziri Misir Mərdanov 2010-cu ili ümumilikdə təhsil sferası üçün uğurlu il sayır. Bildirib ki, qarşıdakı ildə də dövlət proqramlarında nəzərdə tutulan tədbirlər yerinə yetiriləcək. Nazir deyib: "Bu o demək deyil ki, nəzərdə tutduğumuz işlərin hamısını istədiyimiz səviyyədə başa çatdıra bilmişik. Əlbəttə, başa çatmayan, başa çatdırılması mümkün olmayan məsələlər də var. Amma düşünürəm ki, bütövlükdə 2010-cu il Azərbaycanda təhsil sahəsində uğurlu illərdən biri kimi tarixə düşüb".
|
