Akademik Şəfaət Mehdiyev - 100 il

MEA Rəyasət Heyətində Azərbaycanın görkəmli alimi, akademik Şəfaət Mehdiyevin 100 illiyinə həsr edilmiş yubiley tədbiri keçirilib. APA-nın məlumatına görə, MEA prezidenti Mahmud Kərimov akademik Şəfaət Mehdiyevin 1910-cu ildə Güney Azərbaycanın Sərab qəzasının Salqun kəndində doğulduğunu, 4 yaşında atasını itirdikdən sonra ailəsi ilə birlikdə Bakıya köçdüyünü deyib. 1930-cu ilin aprelində Şəfaət Mehdiyev Azərbaycan Sənaye İnstitutunun (hazırkı ADNA) geoloji-kəşfiyyat fakültəsinə daxil olub və 1934-cü ildə ali məktəbi bitirərək neft və qaz yataqlarının kəşfiyyatı üzrə dağ-mədən mühəndisi ixtisasına yiyələnib. 1954-1958-ci illərdə Geologiya İnstitutunun direktoru, 1958-1965-ci illərdə isə Azərbaycan Dövlət Universitetinin rektoru vəzifələrində çalışıb. Akademikin rəhbərliyi ilə 70-dən çox elmlər doktoru və namizədi hazırlanıb. Görkəmli alimin yazdığı kitab, monoqrafiya və dərsliklər uzun illərdir tələbələr, müəllimlər, alim və müxtəlif nəsil oxucular tərəfindən dəyərli elmi vəsait kimi istifadə olunur. Sonda akademikin oğlu Aqşin Mehdiyev atasının xatirəsinə göstərilən hörmət və ehtirama görə minnətdarlığını bildirib.