"Qarabağ" siyasi partiyalar birliyinin hədəfləri və qurumun fəaliyyətində tərəflərin öhdəlikləri müəyyənləşməlidir. Belə olsa, tərəflər arasında heç bir mübahisə qalmaz və birlik uzunmüddətli olar. Bu məsələlər öz həllini tapacaqsa, birlik olacaq, əks təqdirdə yox. Bu sözləri APA-ya ADP sədri Sərdar Cəlaloğlu deyib.
O bildirib ki, Ümid Partiyası və ADP "Qarabağ" birliyində birgə fəaliyyət göstərmək niyyətindədir: "Yaxın günlərdə birlik rəsmi şəkildə elan olunacaq. Liderlər ikilikdə birliyin fəaliyyət konturlarını müəyyənləşdirəcəklər. Bundan sonra partiyaların rəhbər orqanlarında bu məsələ müzakirəyə çıxarılacaq".
Prezident seçkisinə qədər birliyin fəaliyyət göstərib-göstərməyəcəyi ilə bağlı sualı cavablandıran S. Cəlaloğlunun fikrincə, məqsədlər, tərəflərin səlahiyyətləri və fəaliyyət dairələri əvvəlcədən aydın olsa və bu barədə razılaşma əldə edilsə, birlik axıra qədər gedəcək:
"Azərbaycanda birliklərin uzunmüddətli olmamasının səbəbi həmişə qeyri-müəyyənlik ətrafında birləşməkdən qaynaqlanıb. Hər tərəf öz marağını güdür, maraqlar qabaranda parçalanmaya gətirib çıxarır. Biz isə bütün məqamları müəyyənləşdirməliyik. Prezident seçkilərində kimin namizəd olacağı, bu kampaniyada necə iştirak edəcəyimiz aydınlaşmalıdır ki, seçkilər yaxınlaşanda problem yaranmasın. Əks halda, birlik uzunmüddətli ola bilməz".
S.Cəlaloğlu tərəflər arasında öhdəlik götürüləcəyini də qeyd edib: "Birliyin hədəfləri və qurumun fəaliyyətində tərəflərin öhdəlikləri müəyyənləşməlidir. Belə olarsa, heç bir mübahisə qalmaz. Bu məsələlər öz həllini tapacaqsa, birlik olacaq, əks təqdirdə, yox. "Müsavat-AXCP" birliyinin alınmamasının əsas səbəbi odur ki, tərəflər öz prioritetlərini açıq şəkildə ortaya qoymadılar. Qeyri-müəyyənlik formasında birlik alına bilməz".
|
