"ABŞ-ın Cənubi Qafqazda ən yaxşı münasibətlərə malik olduğu Azərbaycana səfir təyinatı məsələsinin bu qədər uzanması yaxşı hal deyil". APA-nın məlumatına görə, bu açıqlamanı jurnalistlərə Milli Məclisin vitse-spikeri Bahar Muradova verib.
O bildirib ki, bu məsələ ABŞ-Azərbaycan münasibətlərinə mənfi təsir edə bilməz: "Düşünmürəm ki, bu, münasibətlərə kəskin mənfi təsir göstərsin. Səfirin olması bir çox məsələlərin vaxtında həllinə təsir göstərərdi. Hesab edirəm ki, səfirliyin əməkdaşları öz işlərinin öhdəsindən layiqincə gəlirlər. Arzu edirəm ki, bu problem həllini tapsın və Senat Azərbaycana təyin olunacaq səfirin namizədliyini təsdiqləsin".
Xatırladaq ki, srağagün ABŞ Senatı Metyu Brayzanın namizədliyi daxil olmaqla, təsdiqlənməmiş səfirlərin namizədliklərinə dair sənədləri Ağ evə qaytardı.
"Başqa namizədlər kimi, Brayzanın da namizədliyi Senatın iş təqvimində qalır və təsdiqlənməyənlərin sənədləri ölkə prezidentinə qaytarılacaq. Bütün bu işlər gələn il Senatın yeni heyətinə təqdim olunacaq", - deyə ABŞ Senatından "Turan"ın Vaşinqton müxbirinə təqdim olunmuş rəsmi şərhdə bildirilir.
Brayzanın namizədliyinin prezident tərəfindən təkrar irəli sürülməsinin mümkünlüyünə gəlincə, ekspertlərin rəyi birmənalı deyil. Məsələ bundadır ki, Brayzaya mane olmağa çalışan senator Bokster yenidən seçilib və o, erməni lobbisinin fəal üzvüdür. Digər təsdiqlənməmiş səfirə - ABŞ-ın Türkiyədəki səfiri Cozef Riakdardoneyə gəlincə, onun vəziyyəti bir qədər fərqlidir, çünki onun təyinatına əngəl törədən senator Sem Braunbek yenidən seçilməyib.
Eyni zamanda, bir çox müşahidəçilər güman edirlər li, Brayzanın namizədliyi yenidən irəli sürülərsə, Senat tərəfindən təsdiqlənəcək.
Xatırladaq ki, Metyu Brayza bu ilin mayında ABŞ prezidenti tərəfindən Azərbaycana səfir təyin olunub. Senatda onun təsdiqlənmə proseduru Brayzanı Azərbaycanpərəst mövqedə və Azərbaycan hökuməti ilə əlaqələrdə ittiham edən erməni lobbisinin əngəl törətməsi üzündən çətinə düşüb və uzun vaxt aparıb.
Buna baxmayaraq, Senatın Xarici Məsələlər üzrə Komitəsi Brayzanın namizədliyini təsdiqləyib. Ancaq məsələ Senatın ümumi heyətində səsverməyə çıxarılmayıb. Beləliklə, ABŞ-ın Bakı səfiri postu ilyarımdan bəridir boş qalır.
|
