Futbol üzrə milli yığmamız 2011-ci il yanvarın 27-dən fevralın 10-dək Birləşmiş Ərəb Əmirliklərinin (BƏƏ) Dubay şəhərində təlim-məşq toplanışı keçirəcək. Yığmanın baş məşqçisi Berti Foqts hazırlıqda və yoxlama oyunlarında iştirak edən futbolçuların adlarını açıqlayıb. Ən böyük gözlənilməzlik Fərhad Əliyevin əsas siyahıdan kənarda qalmasıdır. Əvəzində Andrey Papoviç, Samir Zərgərov, Əziz Quliyev, Elnur Allahverdiyev, Arif İsayev və Murad Hüseynov ilk dəfə yığmanın heyətində oynamaq şansı qazanıblar.
Dubay toplantısına çağırılan heyət qapıçılar belədir: Kamran Ağayev, Aqil Məmmədov, Andrey Papoçiv;
müdafiəçilər: Rəşad Sadıqov, Saşa Yunisoğlu, Vladimir Levin, Vurğun Hüseynov, Rail Məlikov, Ruslan Abuşov, Maksim Medvedyev, Elnur Allahverdiyev, Əziz Quliyev;
yarımmüdafiəçilər: Samir Abasov, Elvin Məmmədov, Samir Zərgərov, Amit Quluzadə, Cavid Hüseynov, Rahid Əmirquliyev, Aleksandr Çertoqanov, Fabio Luis Ramim, Mahir Şükürov, Elnur Abdullayev, Arif İsayev;
Hücumçular: Vüqar Nadirov, Rauf Əliyev, Vaqif Cavadov, Murad Hüseynov.
Azərbaycan yığması BƏƏ-də təlim-məşq toplanışı çərçivəsində bir neçə yoxlama görüşlərində qüvvəsini sınayacaq. Millimizin Dubayda Danimarka və Macarıstan yığma komandaları, eləcə də "Metallist" klubu ilə yoldaşlıq oyunu keçirməsi nəzərdə tutulub. Macarlarla oyunun fevralın 9-da, yəni FİFA-nın yoldaşlıq oyunları üçün müəyyən etdiyi tarixdə olacağı dəqiqdir. Bu oyundan sonra millimiz Dubay toplantısını başa vuraraq, vətənə dönəcək. Macarıstanla görüşə qədər isə komandamız Danimarka ilə qarşılaşmalıdır. Qeyd edək ki, Danimarka yığması ilə oyun haqqında ilkin razılıq əldə edilsə də, matçın tarixinə aydınlıq gəlməyib. Bu məsələ ilə bağlı Azərbaycan Futbol Federasiyası ilə Danimarkanın müvafiq qurumu arasında danışıqlar davam edir. Çox güman ki, matçın tarixi yanvarın sonu, fevralın əvvəlinə təsadüf edəcək.
Yığmamız Dubayda daha bir komanda ilə yoldaşlıq görüşü keçirməlidir. Bu, yanvarın 18-dən fevralın 3-dək Dubayda hazırlıq keçən Ukraynanın "Metallist" klubudur. Xarkov klubu ilə oyunun vaxtı hələ dəqiqləşdirilməyib. Ancaq bu matçın fevralın ilk günlərində olacağı gözlənilir.
|
