Futbol üzrə Azərbaycan çempionatında ilin son turu keçirilib və birincilikdə 51 günlük fasilə yaranıb. Komandalar ilk mərhələdən qalan 3 turluq mübarizəyə gələn il fevralın 12-də başlayacaqlar.
Turun mərkəzi görüşü Lənkəranda keçirilib. Çempionatın lideri "Xəzər-Lənkəran" öz meydanında "Qarabağ"a uduzub. Halbuki ilk dövrədə olduğu kimi "Qarabağ"ı xalsız qoysaydı, fasiləyə "qış çempionu" kimi çıxacaqdı. "Qarabağ" gənc hücumçu Rauf Əliyevin dublu sayəsində çətin qarşılaşmadan qələbə ilə ayrılıb və beşinci pilləni "Qəbələ"nin əlindən alıb. Bu, "Xəzər-Lənkəran"ın yeni mövsümdə öz meydanında ilk məğlubiyyəti olub. Lənkəran klubunun uğursuzluğu "Qarabağ"la yanaşı, əlbəttə ki, "Neftçi"nin işinə yarayıb. Belə ki, öz meydanında Tovuzun "Turan" klubuna qalib gələn "flaqman" yenidən turnir cədvəlində birinci pilləyə yüksəlib. "Neftçi" qış fasiləsinə ən yaxın izləyicisi "Xəzər-Lənkəran"dan 1 xal üstün çıxıb.
İlk altılığa düşmək uğrunda mübarizə aparan "Qəbələ" və "Bakı"nın əyalətdə baş tutan görüşündə qonaqlar qalib gəlib. Jabanın vurduğu yeganə qol Vinfrid Şaferin yetirmələrinin ilk altılığa düşmək şansını saxlayıb. Bununla həm də "Qəbələ"nin çempionatdakı 13 oyunluq məğlubiyyətsiz oyunlar seriyasına son qoyulub. Salyanda isə sensasiya qeydə alınıb: "Muğan" heç kimin gözləmədiyi halda AZAL-a qalib gəlib. Bu nəticə daha çox "İnter"ə sərf edib. Belə ki, Gəncədə eyni adlı komandaya qalib gələn Bakı klubu AZAL-la xallarını eyniləşdirib.
XIX turun nəticələri: "Qəbələ" - "Bakı" - 0:1, "Muğan" - AZAL - 3:1, "Simurğ" - MOİK - 1:1, "Neftçi" - "Turan" - 2:0, "İnter" - "Gəncə" - 1:0, "Xəzər-Lənkəran" - "Qarabağ" - 1:2.
Beləliklə, 41 xal toplayan "Neftçi" turnir cədvəlində yenə birincidir. Flaqmanın ən yaxın izləyicisi "Xəzər-Lənkəran"ın 40 xalı var. Növbəti iki pillənin sahibi - AZAL və "İnter" 36 xal toplayıblar. Bununla da, "Xəzər-Lənkəran" və "Neftçi"nin ilk məqsədlərinə çatdıqlarını indidən söyləmək olar. Bu iki komandanın çempionatın həlledici mərhələsində oynayacağı dəqiqdir. İlk altılıqda mübarizəni davam etdirən digər dörd komandanın hansılar olacağını gələn il ilk dövrənin son 3 turu başa çatdıqdan sonra biləcəyik.
|
