Dekabrın 20-də Hərbi Analitik Tədqiqatlar Mərkəzi (HATM), "Ehtiyatda və İstefada olan Zabitlər" İctimai Birliyi (EİZİB) və Rumıniyanın Azərbaycan səfirliyinin (əlaqə səfirliyi) təşkilatçılığı ilə "NATO-nun Strateji Konsepsiyası: Tərəfdaşlığın yeni perspektivləri və beynəlxalq təhlükəsizlik çağırışları" adlı konfrans keçiriləcək. Bu barədə "Ayna"ya HATM-dan məlumat verilib.
Tədbirdə xarici diplomatlar, politoloqlar, QHT rəhbərləri və ekspertlərin çıxışları gözlənir.
Rumıniya səfiri Nikolaye Ureke və Almaniya səfiri Herbert Quelle "Post Lissabon dövründə NATO tərəfdaşlığı", millət vəkili Rasim Musabəyov "NATO-nun Yeni Strateji Konsepsiyası: Rusiya ilə əməkdaşlığın bərpası və Cənubi Qafqazda təhlükəsizlik", HATM direktoru İldırım Məmmədov "Təhlükəsizlik çağırışlarına qarşı NATO-nun yeni tədbirləri", politoloq Zərdüşt Əlizadə "Regional təhlükəsizlik çağırışlarına qarşı mübarizədə NATO-nun rolu", "Doktrina" Jurnalistlərin Hərbi Araşdırmalar Mərkəzinin direktoru Cəsur Məmmədov "NATO-nun Yeni Strateji Konsepsiyası: Tərəfdaşlığın güclənməsi perspektivləri" adlı məruzələrlə çıxış edəcəklər. Tədbirdə başqa çıxışların da olacağı gözlənilir.
|
