Dünən Dünya Azərbaycanlıları Konqresinin (DAK) rəhbərliyi Atatürk Mərkəzində mətbuat konfransı keçirib. Tədbirdə DAK həmsədri Paşa Qəlbinur təşkilatın dekabrın 11-12-də keçirilmiş XI qurultayı barədə məlumat verib. Onun sözlərinə görə, qurultayda bir neçə məruzə dinlənib, DAK-ın fəxri həmsədrləri olmuş şəxslərə ehtiram ifadə olunub.

Daha sonra 19 nəfərdən ibarət İdarə Heyəti və 3 nəfərlik Nəzarət Təftiş Komissiyası seçilib. İdarə Heyətinin üzvlərini Azərbaycan, ABŞ, Rusiya, Estoniya, İsveç, Hollandiya, Almaniya və Böyük Britaniyadan olan soydaşlarımız təşkil edir. Qurultayda Paşa Qəlbinur (Azərbaycan) və Əhməd Obalı (ABŞ) həmsədr seçiliblər.

P.Qəlbinur digər DAK-ın dekabrın 4-5-də Almaniyanın Bonn şəhərində keçirilən qurultayına da münasibət açıqlayıb. Digər DAK-ın qurultayından mətbuat vasitəsilə xəbər tutduğunu və buna normal baxdığını deyib: "Diaspor təşkilatlarımız nə qədər çox olsa, o qədər yaxşıdır".

P.Qəlbinur əlavə edib ki, XI qurultayda həmsədri olduğu DAK-ın digər DAK-la yaxınlaşması istiqamətində işlər aparılması üçün özünün sədrliyi ilə İdarə Heyətinin 5 nəfər üzvündən ibarət bir qrup formalaşdırılıb. O, gələcəkdə DAK-ların birləşmə perspektivinin olduğunu vurğulayıb, lakin bunun baş tutmayacağı ehtimalının mümkünlüyünə də işarə edib:

"DAK-ların birləşməsi istiqamətində addımlar atacağıq. Lakin birləşmə baş tutmasa belə, bu, heç kim üçün faciə olmayacaq".

Xatırladaq ki, digər DAK-ın dekabrın 4-5-də Almaniyanın Bonn şəhərində keçirilən qurultayında Sabir Rüstəmxanlı (Azərbaycan) və Firidun Pərvizniya (Almaniya) həmsədr seçiliblər.