Qadın voleybolçulardan ibarət komandalarımız - "Rabitə", "Azərreyl", "İqtisadçı" və "Lokomotiv" Avropa miqyaslı klub turnirlərində uğurla mübarizə aparmaqda davam edirlər.
Qitə miqyaslı ən nüfuzlu yarışda - Çempionlar Liqasında mübarizə aparan "Rabitə" növbəti oyununu keçirib. "E" qrupunda yarışan komandamız Polşanın "Aluprof" klubu ilə Bakıda keçirdiyi görüşdə rəqibindən qisas almağı bacarıb. Belə ki, III turda səfərdə polşalılara 2:3 hesabı ilə uduzan "Rabitə" öz meydanında 3:0 (25:13, 25:23, 25:12) hesablı qələbə qazanaraq, 10 xalla yenidən qrupun vahid liderinə çevrilib. Komandamızın ən yaxın izləyicisi "Skavolini"nin (İtaliya) 8 xalı var.
Avropa Voleybol Konfederasiyasının (CEV) bayrağı altında keçirilən "Celenc Cur" turnirində çıxış edən "Azərreyl", "İqtisadçı" və "Lokomotiv" klubları isə növbəti mərhələyə adlayıblar.
"Azərreyl" Yunanıstanın "Markoroulo" komandasına cavab görüşündə də üstün gəlib. Bakıda keçirilən ilk görüşdə rəqibinə tam üstünlüklə qalib gələn "Azərreyl" səfərdə də asan qələbə qazanıb - 0:3 (12:25, 20:25, 15:25).
Azərbaycan Super Liqasının bürünc mükafatçısı "İqtisadçı" isə Avstriyada "Sparkasse" ilə qarşılaşıb. İlk görüşdə asan qələbə qazanan (3:0) universitet komandası cavab matçında da ciddi müqavimətlə üzləşməyib - 0:3 (9:25, 19:25, 22:25).
"Azərreyl" və "İqtisadçı"dan fərqli olaraq "Lokomotiv" növbəti mərhələyə çətinliklə yüksəlib. Belə ki, "dəmiryolçular" III mərhələyə vəsiqə qazanmaq üçün Rusiyanın "Omiçka" klubuna "qızıl setdə" qalib gəlməli olublar. Belə ki, səfərdə 3:2 hesabı ilə uduzan voleybolçularımız cavab matçında rəqibdən qisas alıblar - 3:0 (25:16, 25:23, 26:24). "Lokomotiv" tam üstünlüklə qələbə qazansa da, yeni qaydalara görə cütün taleyi əlavə hissədə həll olunub. "Qızıl set"də daha dəqiq oynayan voleybolçularımız "Omiçka"nı mübarizədən kənarlaşdırıblar.
"Celenc Cur" turnirinin 1/16 final mərhələsinin püşkü atılıb və komandalarımızın növbəti mərhələdə rəqibləri müəyyənləşib. "Azərreyl" Yunanıstanın "Olimpiakos", "Lokomotiv" Avstriyanın "Linz-Steq", "İqtisadçı" isə Serbiyanın "Tent" komandası ilə qarşılaşacaq.
Komandalarımız ilk oyunlarını səfərdə keçirəcəklər. 1/16 final mərhələsində mübarizəyə yanvarın 4-6-da start veriləcək, cavab oyunları isə bir həftədən sonra baş tutacaq.
|
