Çempionlar Liqası turnirinin dördüncü turunda Polşanın "Aluprof" klubunu məğlub edən "Rabitə" yenidən öz qrupunda liderliyi ələ aldı.
Azərbaycan yığma komandasının üzvü, komandanın kapitanı Natalya Məmmədova "azerisrort.com" saytına müsahibəsində "Rabitə"nin son çıxışları və şansları haqqında gümanlarını bölüşüb.
- Komandanızın Çempionlar Liqasında çıxışını necə qiymətləndirirsiz, demək olarmı ki, "Rabitə" minimum vəzifənin öhdəsindən gəlib?
- Müəyyən qədər hə. Əsas rəqibimiz "Skavolini"ni iki xal qabaqlayırıq və bu mərhələni qrup lideri kimi başa vurmağa çox yaxınıq. Səfərdə "Aluprof"a uduzmağımızı nəzərə almasaq, komandamızın çıxışını qənaətbəxş saymaq olar.
- Bakıda "Aluprof" üzərində qazandığınız asan qələbə göstərdi ki, "Rabitə"nin Polşadakı uğursuzluğuna ciddi səbəb yoxuymuş.
- Elədir. Cavab görüşündə biz özümüzü daha inamlı hiss edirdik. İstər müdafiədə, istərsə də, hücumda bütün cəhdlərimiz yaxşı alınırdı. Görünür, komandamız oyundan-oyuna bərkiyir.
- Bəs oyununuz hansı oyunçularla daha yaxşı alınır?
- Demək çətindir. Baş məşqçimiz məşq zamanı müxtəlif variantları sınaqdan çıxarır. Oyunçular arasında əlaqəni möhkəmlətmək tələb olunur. Bu mənada komanda tam formalaşmayıb.
- Çempionlar Liqasının yeni mövsümündə səviyyə necədir?
- Hamımız başa düşürük ki, əsas oyunlar qrup mərhələsi başa çatdıqdan sonra başlayacaq. Həm də çıxış etdiyimiz qrupda güclü klublar toplaşmayıb. Odur ki, bu mərhələni uğurla başa vurmaq niyyətindəyik.
- Buna görə də "Skavolini" ilə səfər matçı daha vacibdir.
- Bəli, həmin oyunda qalib gəlməliyik. Düşünürəm ki, onları yenə də üstələyə bilərik.
- Sizcə, son dövrlər İtaliyada klub voleybolunda səviyyənin düşməsinə səbəb nədir?
- Çünki İtaliya A seriyasında çıxış edən voleybolçular başqa çempionatlara keçiblər. - İndi bundan sonra "Rabitə" bütün diqqətini ölkə çempionatına yönəldəcək?
- Şübhəsiz. Azərbaycan çempionatında ilin sonuna kimi üç oyun keçirməliyik. Həmin oyunlarda qalib gəlib liderliyi ələ almaq istəyirik.
|
