Rusiyanın Sankt-Peterburq şəhərində keçiriləcək sayca XIX ənənəvi Birlik kubokunun püşkatması olub. Gələn il yanvarın 14-dən 23-dək keçiriləcək yarışda ölkəmizin şərəfini qoruyan Bakının "İnter" klubunun rəqibləri müəyyənləşib.
Son Azərbaycan çempionu "A" qrupunda Moldova çempionatının gümüş mükafatçısı "İskra-Stal", Tacikistanın "İstiqlal" və Qırğızıstanın "Neftçi" klubları ilə mübarizə aparmalı olacaq. Qrup mərhələsində 16 komanda dörd qrupda mübarizə aparır.
"B" qrupu: "Tobol" (Qazaxıstan), "Skonto" (Latviya), "Mika" (Ermənistan), "Bunedkor" (Özbəkistan);
"C" qrupu: "Zenit" (Rusiya), "Nebitçi" (Türkmənistan), "Şaxtyor" (Belarus), "Flora" (Estoniya);
"D" qrupu: Gənclərdən ibarət Rusiya millisi, "Dinamo" (Kiyev, Ukrayna), XİK (Finlandiya, "Ekranas" (Litva).
Azərbaycan çempionu "İnter"in Birlik kubokundakı rəqibləri münasib komandalardır. Belə ki, komandamızın hər 3 rəqibi yarışın debütantıdır. Buna baxmayaraq, həm Moldova, həm Qırğızıstan, həm də Qazaxıstan klubları ilə dəfələrlə görüşmüşük. Birlik kubokunda son ölkə çempionu "Neftçi" ilə təmsil olunacaq Qırğızıstan klubları bizimkilür üçün həmişə asan yem olub. Klublarımız bu ölkənin "Jastık Al-Altın", "Dordoy-Dinamo" kimi komandalarından həmişə üstün olublar. Qırğızıstanı təmsil edən komandalar tarix boyu bizə qol vura bilməyiblər. Daha çox 8 dəfə qarşılaşdığımız Tacikistan təmsilçiləri də bizimkilərə müqavimət göstərməkdə çətinlik çəkib. Bu ölkəni təmsil edən "Reqar-Tadaz", "Sitora", "Pamir" və "Vaxş" klubları həmişə Azərbaycan kollektivlərinə uduzublar.
Moldova komandaları isə bizikilər üçün çətin rəqib sayılır. Hər halda, indiyə kimi 3 dəfə onlar, 1 dəfə biz qalib gəlmişik. Ümumi balans Moldovanın xeyrinədir. Amma bir məsələ var ki, bu dəfə Moldovanı təmsil edən nə "Şerif"dir, nə də "Zimbru". "İskra-Stal" bu iki klubla müqayisədə xeyli zəifdir. Bu komanda turnirdən imtina edən "Şerif"i əvəzləyib.
Yeri gəlmişkən, "İnter" qrup mərhələsini müvəffəqiyyətlə başa vurarsa, "B" qrupundan olan komandaların biri ilə görüşəcək.
|
