Dünən "Azadlıq" və "Yeni Müsavat" qəzetlərinin bir qrup əməkdaşı, habelə "Dalğa" Gənclər Hərəkatının fəalları Yasamal rayon Məhkəməsinin binası qarşısında etiraz aksiyası keçiriblər.
Aksiyaçılar əllərində "Ayı 1 milyona - pensiya 100 manat!", "Ayılardan və jurnalistlərdən əl çəkin" və sair şüarlar tutaraq nəqliyyat naziri Ziya Məmmədovun oğlu, iş adamı Anar Məmmədovun adıçəkilən qəzetlərə qarşı məhkəmə iddiasını geri götürməyi tələb ediblər.
Aksiyada 30-a yaxın adam iştirak edib. Polis aksiyanı qısa müddətə dağıdaraq, aksiya iştirakçılarının əllərindəki plakatlarını cırıb və aksiya iştirakçısı olan jurnalistlərdən Elmin Bədəlov, Emil Salmanoğlu və Samir Kazımlını saxlayaraq Yasamal rayon Polis İdarəsinə aparıb. Jurnalistlər xəbərdarlıq alandan sonra sərbəst buraxılıb.
Belə ki, dünən həm də Yasamal rayon Məhkəməsində adıçəkilən qəzetlərlə bağlı məhkəmə prosesi keçirilməli idi. Amma hakim Elçin Qurbanovun məzuniyyətdə olmağına görə proses qeyri-müəyyən vaxta təxirə salınıb.
"Azadlıq" və "Yeni Müsavat" qəzetlərində Anar Məmmədovun 1 milyon manata ayı kababı yeməsi və Dubaydan deportasiya edilməsi barədə məqalələr çap olunub. Bu səbəbdən də o hər iki qəzeti məhkəməyə verərək, onların müvafiq olaraq 250 min manat məbləğində cərimələnməyini tələb edib.
Məqalələr "Azadlıq" qəzetinin 2 iyul 2010-cu il sayında "Kəmaləddin Heydərovun ayısını yedilər" başlığı ilə dərc olunub. "Yeni Müsavat" qəzeti əlavələrlə bu yazını təkrar çap edib.
"Yeni Müsavat" qəzeti isə sentyabrın 14-də "Şeyx Anar Məmmədovu Dubaydan qovdu" başlıqlı məqalə dərc edib.
|
