Yasamal rayon Məhkəməsində AXCP sədrinin müavini, builki parlament seçkilərində "AXCP-Müsavat" seçki blokunun 33 saylı Xətai seçki dairəsindən namizədi olmuş Fuad Qəhrəmanlıya qarşı xüsusi ittiham qaydasında verilmiş üç iddiaya baxılmalı idi.
Lakin iclasın əvvəlində hakim Sərdar Mehrəliyev prokurorluğun deputatlığa namizədin toxunulmazlıq hüququ olduğunu nəzərə alaraq cinayət işinin başlanmasına icazə verilməməsi barədə müraciətini oxuyub. Bu əsasla iddialara baxılmasından imtina olunub.
Xatırladaq ki, Qəhrəmanlıya qarşı hakim Yeni Azərbaycan Partiyasının üzvü, deputat Hüseynbala Mirələmov, Müasir Müsavat Partiyasının sədri Hafiz Hacıyev və keçmiş deputat Əhəd Əbiyev iddia qaldırmışdı. Adıçəkilən şəxslər müxalifətçini seçkiqabağı kampaniya zamanı İTV-də çıxışında onları təhqir etməkdə ittiham ediblər.
Seçki Məcəlləsinin 70-ci maddəsinə əsasən, deputatlığa namizəd haqda cinayət işinin başlanması və deputatlığa namizədlə bağlı xüsusi ittiham qaydasında qaldırılan iddiaya baxılması üçün baş prokurorun razılığı olmalıdır. Məsələ ilə bağlı dekabrın 3-də Baş Prokurorluğa sorğu verilmişdi.
|
