İqtisadi Tədqiqatlar Mərkəzi ölkənin 22 regionunda bu noyabr ayı ərzində apardığı qiymətlərin statistik müşahidəsinin nəticələrini açıqlayıb. Bu iş İsveçrənin İqtisadi Məsələlər üzrə Dövlət Katibliyi tərəfindən maliyyələşdirilən "Alternativ inflyasiya səviyyəsinin hesablanması və modellərin işlənilməsi" layihəsi çərçivəsində görülür.
Statistik müşahidələrin nəticəsi göstərir ki, bu ilin noyabr ayı ərzində istehlak qiymətləri 2,75 faiz artıb. Bu zaman Bakıda qiymətlər 2,94 faiz, regionlarda isə 2,56 faiz artıb. Bu ilin 11 ayında ölkədə 9,16 faizlik inflyasiya baş verib. Ötən ilin noyabrına nisbətən ölkədə istehlak qiymətləri indeksi 10,18 faiz artıb.
Beləliklə, noyabr ayı ərzində ən çox bahalaşma ərzaq məhsulları üzrə əla növ buğda çörəyi (16,77%), günəbaxan yağı (8,35%), bulka (7,35%), yumurta (20,31%), peçenye (7,25%), manna yarması (5,81%), ən çox ucuzlaşma yenə də ərzaq məhsullarından yerkökü (10,73%), naringi (13,76%), xurma (6,03%), toyuq (1,23%), qoyun ətində (1,10%) qeydə alınıb.
Dövlət Statistika Komitəsi isə noyabr ayında Azərbaycanda istehlak qiymətləri indeksinin 1,8 faiz artdığını elan edib. Fərq göz önündədir.
Mərkəzin ekspertləri 22 regionda noyabr ayı ərzində aparılan qiymətlərin statistik müşahidəsinin nəticələri və Nazirlər Kabinetinin 2009-cu il tarixli qərarı ilə təsdiq olunmuş normativlər əsasında noyabr ayı üzrə minimum istehlak səbətinin dəyərini hesablayıblar. Həmin hesablamalara əsasən, ötən ay yaşayış minimumu əmək qabiliyyətli əhali üçün adambaşına 156,18 manat, pensiyaçılar üçün 137,14 manat, 0-14 yaşlı uşaqlar üçünsə 191,69 manat təşkil edib. Noyabr ayında əmək qabiliyyətli əhali adambaşına ərzağa minimum 98,80 manat, pensiyaçılar 85,63 manat, 0-14 yaşlı uşaqların valideynləri isə 112,71 manat xərcləməli olub. Ay ərzində bazardakı qiymətlərlə əhalinin qeyri-ərzaq məhsullarına çəkdiyi minimum xərcləri işləyən əhali üçün 32,28 manat, pensiyaçılar üçün 29,25 manat, 0-14 yaşlı uşaqlar üçün 61,51 manat, xidmət xərcləri isə müvafiq olaraq 25,1 manat, 22,26 manat və 17,47 manat təşkil edib.
Xatırladaq ki, "Azərbaycanda 2010-cu il üçün yaşayış minimumu haqqında" qanunun əsasında ölkədə 2010-cu il üçün yaşayış minimumu 87 manat, əmək qabiliyyətli əhali üçün 96 manat, pensiyaçılar üçün 68 manat, uşaqlar üçün 72 manat məbləğində müəyyən edilib.
|
