Bu həftə Azərbaycan kubokunda bütün 1/4 finalçılar müəyyənləşib. "Qarabağ"ı yarışlardan uzaqlaşdırmaqla sensasiyaya səbəb olan "Turan"ın ardınca "Neftçi", "Qəbələ", AZAL, "Bakı", "Abşeron", "Xəzər-Lənkəran" və "İnter" növbəti mərhələyə çıxıb.

"Flaqman" Premyer Liqada olduğu kimi, kubokda da "Gəncə"ni asanlıqla məğlub edərək, növbəti mərhələyə adlayıb. İndi "Neftçi"nin 1/4 finalda "Xəzər-Lənkəran"la görüşəcəyini nəzərə alsaq, əsas favoritlərin görüşünü erkən final saymaq olar.

"Turan" kimi "Abşeron" da sürpriz çıxışını davam etdirir. Mirbağır İsayevin yetirmələri MOİK-in ardınca Premyer Liqanın digər autsayderi "Simurğ"u səfərdə yenib. "Turan" kimi "Bakı" da 1/4 finala oyun sonrası penaltilərlə yüksəlib. "Qəbələ", AZAL, "Xəzər-Lənkəran" və "İnter"in rəqiblərinin I divizion təmsilçiləri olduğunu nəzərə alsaq, bu klubların növbəti mərhələyə çıxacaqları əvvəlcədən proqnozlaşdırılırdı.

Azərbaycan kuboku 1/8 final mərhələsi: "Gəncə" - "Neftçi" - 1:3, "Qəbələ" - "Neftçi" İSM - 2:0, "Simurq" - "Abşeron" - 1:1 (penaltilərlə - 2:5), "Rəvan" - AZAL - 1:2, "Bakı" - "Muğan" - 1:1 (penaltilərlə - 5:3), "Xəzər-Lənkəran" - "MKT-Araz" - 3:1, "Şuşa" - "İnter" - 1:4.

Azərbaycan kubokunda mübarizə gələn il davam edəcək. 1/4 final mərhələsinin oyunları martın 2-3-də və 8-9-da keçiriləcək. Bu mərhələdən başlayaraq qalib bir yox, artıq iki oyunla müəyyənləşəcək. 1/4 finalın cütlükləri bunlardır:

"Neftçi" - "Xəzər-Lənkəran", "Qəbələ" - "Bakı", "Abşeron" - "İnter" və AZAL - "Turan".

Qaydalara görə, ilk göstərilən komanda ilk meydan sahibi olacaq. Prinsipial rəqiblər, hazırda çempionatımızda ilk iki pillənin sahibi olan "Neftçi" ilə "Xəzər-Lənkəran" tarixlərində ilk dəfə kubokda görüşəcəklər. Bununla, əzəli rəqiblərin qarşıdurması çempionatda olduğu kimi, bu turnirdə də davam edəcək.