Bu həftə voleybol üzrə Avropa kubokları özünün qaynır günlərini yaşayıb. Qitənin nüfuzlu klub turnirlərində çıxış edən voleybol komandalarımız növbəti oyunlarını keçiriblər.
Qadın voleybolçular arasında Çempionlar Liqasının III turuna yekun vurulub. Avropanın ən nüfuzlu klub turnirində iştirak edən "Rabitə" Polşada "Aluprof" komandasının qonağı olub. Əvvəlki iki görüşdə məğlubiyyət acısı dadmayan Azərbaycan çempionu uduzub - 3:2 (25:21; 21:25; 25:18; 20:25; 15:13).
Xatırladaq ki, "Rabitə" İtaliyanın "Skovalini", Polşanın "Aluprof" və Rumıniyanın "Dinamo- Romprest" klubları ilə eyni qrupda mübarizə aparır. Son oyunda uğursuzluğa baxmayaraq, "Rabitə" qrup birincisidir.
Nisbətən aşağı səviyyəli "Celenc Cur" turnirində çıxış edən "Azərreyl" və "İqtisadçı" da, demək olar ki, növbəti mərhələyə vəsiqəni təmin ediblər.
"Azərreyl" turnirin II təsnifat mərhələsi çərçivəsində Yunanıstan təmsilçisi "Markopoulo"ya qalib gəlib - 3:0 (25:20, 25:11, 25:14).
Rəşad Yazıçıoğullarının başçılıq etdiyi "İqtisadçı" isə Avstriyanın "Srarkasse" komandasına heç bir şans verməyib - 3:0 (25:10, 25:4, 25:11).
Bənzər yarışda mübarizə aparan "Lokomotiv" isə daha ciddi rəqiblə üz-üzə gəlib. Super Liqanın gümüş təmsilçisi Rusiyada "Omiçka" ilə qarşılaşıb. Ölkə çempionatında məğlubiyyətləri sıralayan Aleksandr Çervyakovun komandası qara zolaqdan Rusiyada çıxmağa yaxın olsa da, istəyini reallaşdıra bilməyib: 3 hissədən sonra 2:1 hesabı ilə irəlidə olan "Lokomotiv" sonda üstünlüyü əldən verib 3:2 (25:22, 20:25, 20:25, 25:21, 15:10).
Komandalarımız cavab görüşlərini gələn həftə keçirəcəklər.
|
