Dünən qadınlar arasında həndbol üzrə dünya çempionatının seçmə mərhələsinə start verilib. Komandamız seçmə mərhələdə Yunanıstan, İsveçrə və Makedoniya yığmaları ilə birgə II qrupda mübarizəyə başlayacaq. Yığmamızın yer aldığı qrupun oyunları Yunanıstanda təşkil olunub.
Yığmamızın baş məşqçisi Rəfiqə Şabanovanın başçılıq etdiyi qadın həndbolçularımız dünya çempionatının seçmə mərhələsinə ciddi hazırlaşıblar. Həndbol yığmamızın üzvləri hazırlıqla əlaqədar oktyabrın axırında Çexiyada, noyabrın sonlarında isə Ukraynada təşkil olunan beynəlxalq turnirlərə qatılaraq, özlərini bir daha sınayıblar. R.Şabanova mətbuata bildirib ki, beynəlxalq turnirdə iştirak edən həndbolçularımız oyunlara hazırdır və son yoxlama görüşlərində qələbə onları ruhlandırıb:
"Ukraynada təşkil olunan turnir bizə çox şey verdi. Düzdür, ev sahiblərinə və Belarus yığmasına uduzub, Latviya millisini məğlub etdik. Bu oyunlardan sonra həndbolçularımızda özlərinə inam bir qədər də artdı. İndi Yunanıstanda uğurlu çıxış edib, qalib gəlmək istəyirik".
Olimpiya çempionumuzun sözlərinə görə, rəqiblər barəsində ətraflı məlumat toplaya bilməyiblər. Bu azmış kimi, milli komandamız Drama şəhərində keçirilən seçmə mərhələnin oyunlarına tam heyətlə çıxa bilməyəcək.
Belə ki, əsas heyət oyunçularımız Yelena Qratsova və Səbinə Babayeva zədəli olduğu üçün komandaya kömək edə bilməyəcəklər. Onların yoxluğu komandamız üçün böyük itkidir. Yığmamız səfərə üç qapıçı olmaqla, 15 oyunçu ilə yollanıb. Rəfiqə Şabanova Drama şəhərində Valentina Solomaxa, Səbinə Nuriyeva, Anna Cəfərova, Rumiyyə Xametova, Səkinə Abbasova, Anna Həmidova, Mariana Tankatskaya, Yulya Deryabina, Peqe Yekaterina, Olya Poqonina, Yulya Lukyanenko, Nailə Çikayeva, İranə Qasımova, Yana Qornyakın xidmətindən yararlanacaq.
Rəqiblərimizə gəlincə, hənbolçularımız bu komandaların heç biri ilə qarşılaşmayıb. Makedoniya millisi güclü heyəti ilə öyünə bilər. Yunanıstan isə ev sahibi qismində çıxış edir. Odur ki, seçmə yarışda hansı komandanın favorit olmasını demək çətindir.
|
