2018 və 2022-ci illərdə futbol üzrə dünya çempionatlarına ev sahibliyi edəcək ölkələrin adları məlum olub. 2018-ci il dünya çempionatının Rusiya Federasiyasında, 2022-ci il birinciliyinin isə Yaxın Şərq ölkəsi olan Qətərdə keçirilməsi qərara alınıb. Bu barədə qərar FİFA İcraiyyə Komitəsinin İsveçrənin Sürix şəhərində keçirilən toplantısında qəbul olunub. 2018-ci il dünya çempionatı ilə bağlı keçirilən gizli səsvermədə Rusiya digər iddiaçılar - İngiltərə, İspaniya-Portuqaliya və Belçika-Hollandiyanın birgə təşəbbüsünü üstələyib.
2018-ci ildəki mundialın Avropada keçiriləcəyi əvvəlcədən bəlli idi. Çünki namizədlərin hamısı Avropa ölkələri idi. Birgə namizədliyini irəli sürən İspaniya və Portuqaliyada futbola olan maraqla yanaşı, bu ölkələrdəki turizm, otelçilik, nəqliyyat kimi sahələrin inkişaf etməsi onları digər ölkələrdən fərqləndirirdi. Amma Rusiyanın da öz üstünlükləri vardı. Belə ki, indiyədək həmin ölkədə bu səviyyədə turnir keçirilmədiyi, hakimiyyətin yarışa tam dəstəyi, böyük büdcə, dünya çempionatı keçirilməsinin regionda futbolun inkişafına ciddi təkan verməsi Rusiyanın üstünlüklərindən idi.
Bununla belə, Rusiyanın zəif cəhətləri də az deyil. Məsələn, təhlükəsizliklə bağlı problemlər, turniri qəbul edəcək şəhərlər arasında nəhəng məsafələr və s.
Qeyd edək ki, ruslar çempionatın oyunlarının 13 şəhərdə - Kalininqrad, Sankt-Peterburq, Moskva, Yaroslavl, Nijnıy Novqorod, Samara, Qazan, Saransk, Volqoqrad, Rostov, Krasnodar, Soçi, Yekaterinburqda keçirilməsini nəzərdə tutublar. Qeyd edək ki, final mərhələsinin iştirakçılarından birinin adı artıq məlumdur. Bu, meydan sahibi Rusiya yığmasıdır.
Qeyd edək ki, Rusiyada indiyədək futbol üzrə dünya çempionatı keçirilməyib.
2022-ci ilin dünya çempionatına ev sahibliyi etmək üçünsə müxtəlif qitələrdən iddiaçılar vardı: ABŞ, Qətər, Avstraliya, Koreya və Yaponiya. Lakin çempionatın Qətərdə keçirilməsi ilə bağlı FİFA İcraiyyə Komitəsinin qərarı gözlənilməz olub. Beləliklə, Qətər futbol üzrə dünya çempionatını keçirəcək ilk müsəlman ölkəsi olacaq. Qətər əmiri nəticənin açıqlanma mərasimindən sonra deyib:
"Hamını inandırmaq istəyirəm ki, bu seçimin doğruluğuna əmin olacaqsınız. FİFA və bütün dünya futbolsevərləri bizimlə fəxr edəcəklər".
|
