"Xaç daşları yalnız Ermənistanda olan və erməni yaradıcılığına məxsus bir incəsənət növü kimi YUNESKO-nun siyahısına daxil edilib. Yəni heç kəs Azərbaycan ərazisində olan Albaniya dövrü xaç daşlarına hər hansı iddia irəli sürə bilməz". Bunu jurnalistlərə açıqlamasında Keniyadan yenicə qayıdan mədəniyyət və turizm naziri Əbülfəs Qarayev bildirib:
"Komissiyanın iclası zamanı bizi narahat edən məsələlərdən biri Ermənistan tərəfindən xaçkarlar və xaç daşların siyahıda təqdim olunması idi. Xalqımız çox yaxşı bilir ki, Azərbaycanda yerləşən bu tarixi nişanələr və müxtəlif binaların üzərində yerləşən xaçlar Albaniya dövrünə məxsus yaradıcılıq nümunələridir. Bu nümunələrin sırf Ermənistan adı altında siyahıya daxil edilə biləcəyindən narahat idik. Ona görə də Bakı elmi ictimaiyyətinin, təhsil ocaqlarının, Azərbaycan diasporunun, dövlət orqanlarının ciddi etirazlarını nəzərə alaraq YUNESKO-nun baş katibliyi, müdirliyi və komissiyanın üzvləri bu məsələyə xüsusi həssaslıqla yanaşdılar. İki gün ərzində gecə saat 12-yə qədər gedən ciddi fikir mübadiləsi nəticəsində müvafiq nümunələr siyahıya başqa adla - yalnız Ermənistanda olan və erməni yaradıcılığına məxsus bir incəsənət növü kimi daxil edildi. Qafqaz Albaniyasına aid xaç daşlarının ora daxil olunması imkanları tamamilə kənarlaşdırıldı. Heç kəs alban xaç daşlarına qarşı hər hansı iddia irəli sürə bilməz". Nazirin sözlərinə görə, Ermənistan tərəfi bu addımı etirazla qarşılamayıb, irəli sürülən təkliflərə razılıq verib:
"Ermənistan tərəfi dərk etdi ki, bu komissiyanın işini siyasətə daxil etmək olmaz. Orada Dağlıq Qarabağa, alban kilsəsinə, Azərbaycanla bağlı digər məsələlərə toxuna biləcək maddələrin çıxarılmasına razılıq verdi. Ondan sonra komissiya buna müsbət rəy verdi".
|
