Futzal üzrə UEFA kubokunda Azərbaycanı təmsil edən ölkə çempionu "Araz" mübarizəni erkən dayandırıb. Braziliyalı Joze Alesio da Silvanın başçılıq etdiyi və 2009/10 mövsümündə Avropanın 3-cü komandası olan Naxçıvan klubu çıxışını bu dəfə elit-raundda bitirib. Buna elit-raund mərhələsinin B qrupunda keçirilən oyunlardan sonra aydınlıq gəlib. "Araz" növbəti mərhələyə çıxmaq uğrunda "Montesilvano"(İtaliya), "VİZ-Sinara" (Rusiya), "Ararat" (Kipr) klubları ilə mübarizə aparıb. Qrup oyunları Rusiyanın Yekaterinburq şəhərində keçirilib.
Azərbaycan çempionu ilk turda "Ararat"a qarşı oynayıb. Naxçıvan təmsilçisinin 2:1 hesablı qələbəsi ilə başa çatan görüşdə komandamız rəqibini darmadağın etməli idi. Belə ki, cəmi 40 dəqiqə davam edən matç ərzində "Araz" rəqib qapısına 40 zərbə endirib. Rəqib isə qapımıza vur-tut 6 zərbə endirməyə macal tapıb. Bununla belə, futzalçılarımız rəqibə kiçik üstünlüklə qalib gəliblər. İkinci turda "Montesilvano" ilə heç-heçə oynayan "Araz" növbəti mərhələyə çıxmaq şansını saxlayıb. Beləliklə, "Araz"ın taleyi Rusiyanın "VİZ-Sinara" klubu ilə oyunda həll olunmalı idi. Lakin...
Üçüncü tura qədər "Araz"la şərikli liderlik edən "İtaliya" çempionu "Montesilvano" Kiprin "Ararat" klubunu 10:0 hesabı ilə darmadağın edib. Bununla da apenninlilər "Araz"ı çətin vəziyyətdə qoyublar. İtaliyanlara çatmaq və qrup qalibi olmaq üçün komandamız son turda ən azı 10 top fərqi ilə qalib gəlməli idi. Rəqibsə qrupun aşkar autsayderi olduğu əvvəlcədən bilinən kiprlilər deyil, güclü Rusiya çempionu idi. Son 3 ildə 2 dəfə UEFA kubokunun finalında oynayan, bunların birində qalib gələn, üstəlik hazırkı turnirdə meydan sahibləri olan yekaterinburqlularla görüşdə "Araz" hesabı açsa da, uğurun davamı gəlməyib. Azərbaycan çempionu cari avrokubok mövsümündə ilk məğlubiyyətini almaqla (2:3) qrup ikinciliyini də əldən verib.
Maraqlıdır, komandanın baş məşqçisi "Araz"ın uğursuzluğuna üzülsə də, oyunçularından razı qalıb. O, komandasının uğursuzluğunu ilk matçda zəif nəticə əldə olunması ilə əlaqələndirib. Yeri gəlmişkən, komandanın aparıcı futzalçıları Maşado Nilson və Serjao yarışda iştirak etməyiblər. Bu futzalçılar maliyyə məsələsində rəhbərliklə razılığa gələ bilmədiklərindən klubdan ayrılıblar.
|
