Bu həftə Birləşmiş Ərəb Əmirliklərinin paytaxtı Abu-Dabi şəhərində cüdo üzrə beynəlxalq Qran-pri turniri başa çatdı. Yarışa güclü heyətlə yollanan Azərbaycan komandası, təəssüflər olsun ki, imkanlarından aşağı səviyyədə çıxış edib. Halbuki bu yarışda uğurlu nəticə əldə etmək çox vacib idi. Çünki bu turnirdə uğur qazanan cüdoçular mükafatlara sahib çıxmaqla yanaşı, həm də lisenziya balları toplaya bilərdilər. Lisenziya ballarını toplamaq isə 2012-ci il London Olimpiadasında iştirak etmək arzusunda olan hər bir idmançı üçün çox vacibdir.

8 cüdoçu arasında ən yaxşı nəticəni 30 yaşlı Elxan Rəcəbli (81 kq) göstərib. Bir də sonuncu dəfə Tunisdə, may ayında keçirilən Qran-pri turnirində çıxış edən Mövlud Mirəliyev (100 kq) istisna olmaqla, qalan digər cüdoçularımız etimadı doğrultmayıblar. Pekin Olimpiadasının gümüş mükafatçısı M.Mirəliyev bu dəfə ikinci dövrədə uduzsa da, çıxışı ümidverici olub. M.Mirəliyev növbəti Olimpiadaya vəsiqə qazanmaq qərarını qətiləşdirsə, istəyinə nail ola bilər.

Yarışdan əvvəl çoxları komandamızın aparıcı üzvlərinin uğur qazanacağına ümid edirdilər. Bu mənada daha çox Elxan Məmmədovdan (90 kq) nəticə gözləyənlər çox idi. Ona bəslənən ümidlər əsassız deyildi. Çünki Elxan Məmmədov komandamızın yeganə üzvüdür ki, dünya çempionatının mükafatını qazanıb və dünya reytinqində ilk onluqda yer alıb. Amma heyf ki, yığmanın ən ümidverici idmançısı Abu-Dabidə müvəffəqiyyət qazana bilmədi. Yeri gəlmişkən, Pekin Olimpiadasının qalibi Elnur Məmmədli xəstələndiyinə görə son anda tatamiyə çıxmayıb.

Abu-Dabi Qran-prisi qadın cüdoçularımız üçün də uğurlu olmayıb. Komandamızın ən titullu cüdoçuları Kifayət Qasımova (57 kq) və Ramilə Usubova (63 kq) ilk görüşlərdə uduzaraq mübarizəni dayandırmalı olublar. Halbuki 2012-ci il London Olimpiadasına düşmək baxımından qadınların imkanları daha məhduddur.

Qeyd edək ki, London Olimpiadasına vəsiqə qazanmaq üçün qadın cüdoçularımız dünya reytinqində ilk 12 idmançı sırasına düşməlidirlər. Odur ki, bundan sonra keçiriləcək hər yarış cüdoçularımız üçün həlledicidir. Onu da qeyd edək ki, adını çəkdiyimiz bu qadın cüdoçularımızın hazırkı durumu istənilən səviyyədə deyil. Belə ki, Kifayət Qasımova zədəsini yenicə sağaldıb, Ramilə isə zədəli çiyni ilə tatamiyə çıxıb.