Voleybol üzrə qadınlar arasında Çempionlar Liqasının (ÇL) qrup mərhələsinin oyunlarına start verilib. Qitənin 16 ən güclü komandasının mübarizə apardığı yarışda Azərbaycanı "Rabitə" klubu təmsil edir.

Serbiyalı mütəxəssis Dejan Brdyoviçin başçılıq etdiyi komandamızın ilk sınağı səfər oyununa təsadüf edib. Debüt Azərbaycan çempionu üçün uğurlu olub. Voleybolçularımız Rumıniya çempionu "Dinamo-Romprest"ə qarşı ilk oyunda rəqibinə əsla şans verməyib.

İlk hissədə 25:18 hesabı ilə qələbə qazanan paytaxt klubu ikinci setdə rumıniyalılara 25:22 hesabı ilə qalib gəliblər. Üçüncü hissə isə sonuncu olub - 25:20. Beləliklə, "Rabitə" qarşılaşmanın son nəticəsini müəyyənləşdirib - 3:0. Çempionlar Liqasına güzəştli kartla buraxılan Azərbaycan çempionu növbəti görüşünü dekabrın 2-də Bakıda keçirəcək. Rəqib isə İtaliyanın "Skovalini" komandası olacaq.

Qitənin ən mötəbər klub turnirində mübarizəyə başlayan Azərbaycan çempionu buna qədər Avropa Voleybol Konfederasiyasının bayrağı altında keçirilən CEV kuboku və "Çağırış kuboku"nda yarışıb. "Rabitə" voleybolçuları ÇL-lə müqayisədə daha zəif olan bu turnirlərdə müəyyən uğura imza atmağı bacarıblar. Çünki 2007/2008-ci illər mövsümündə CEV kubokunda debüt edən komandamız mübarizəni 1/8 finalda dayandırsa da, 2 il sonra analoji yarışda bürünc medala sahib oldu. 2008/2009-cu illər mövsümündə isə "rabitəçilər" Çağırış kubokunda 1/4 finala kimi irəliləməyi bacardılar.

Bakı voleybolçuları Çempionlar Liqasında da bu uğuru davam etdirməyə çalışacaqlar. Yarışın həlledici mərhələsi sayılan "Dördlər finalı"na kimi irəliləməyi qarşıya məqsəd qoyan "Rabitə"nin bu mövsüm də uğurla çıxış edəcəyi gözlənilir. Heyətində dünyanın sayılıb-seçilən voleybolçularının cəmləşdiyini nəzərə alsaq, bu çətin olmamalıdır. Çünki son mövsümdə CEV kubokunda III yer uğrunda Rusiya "Uraloçka"sına qalib gələn "Rabitə" bu dəfə Çempionlar Liqasının finalında eyni uğuru təkrarlamağa qadirdir. Xatırladaq ki, "E" qrupunda "Rabitə" ilə yanaşı İtaliyanın "Skavolin" (İtaliya) və "Aluprof" (Polşa) klubları da mübarizə aparır.