Rusiya ATƏT-in üzvü olan ayrı-ayrı ölkələrin Azərbaycanda 7 noyabr parlament seçkilərinin beynəlxalq standartlara uyğun olmadığı barədə qiymətləri ilə razılaşa bilməz. Məlumata görə, bu barədə Rusiyanın ATƏT yanında daimi nümayəndəsi Ənvər Əzimov bəyan edib.
"Məlum olduğu kimi, ATƏT-də hələ də seçki proseslərinin monitorinqinin vahid qaydaları işlənməyib. Buna görə də bu cür iradlarla çıxış etməzdən əvvəl bir daha beynəlxalq müşahidəçiliyin prinsipləri və beynəlxalq müşahidəçilərin statusu barədə sənədin hazırlanmasını təklif edirik", - deyə Əzimov bildirib.
Daimi nümayəndə xatırladıb ki, MDB missiyası ən çoxsaylı monitorinq qruplarından olub: "Bu missiyanın vahid rəyinə əsasən, seçkilər demokratik və şəffaf, ən əsası Azərbaycan qanunvericiliyinə uyğun olaraq keçirilib".
Əzimovun sözlərinə görə, MDB nümayəndələri tərəfindən qeydə alınmış nöqsanlar minimal xarakter daşıyıb və səsvermənin ümumi nəticəsinə təsir göstərməyib.
"MDB missiyasına seçicilərdən, seçki məntəqələrindən və yerli müşahidəçilərdən ciddi şikayət və irad daxil olmayıb. MDB missiyasının rəsmi bəyanatı səsvermənin rəsmi nəticələri elan olunduqdan sonra açıqlanacaq və ATƏT-də yayılacaq", - deyə Əzimov əlavə edib.
Bununla bağlı Əzimov vurğulayıb ki, MDB ekspertlərinin "obyektiv və mötəbər nəticələri" ATƏT Demokratik Təsisatlar və İnsan Haqları Bürosu missiyasının, ATƏT PA, AŞPA və Avroparlament müşahidəçilərinin nəticələri ilə təzad təşkil edir.
"Bu strukturların yaydığı sənəddə aşkar uyğunsuzluqlar var. Monitorinq keçirildiyi seçki məntəqələrinin 90%-də səsvermənin gedişi müsbət qiymətləndirilir, nəticədə isə nəyə görəsə ümumilikdə seçki kampaniyasının ölkənin tərəqqisi və demokratik inkişafından xəbər vermədiyi iddia olunur. DTİHB missiyasının rəhbəri, hörmətli xanım Odri Qloverin çıxışı da təəccüb doğurur. Çıxışda azad seçkilərin keçirilməsi üçün şəraitin olmaması və səsvermə günü ciddi nöqsanlardan danışılır. Lakin missiyanın rəylərində Azərbaycan MSK-nın ciddi və fəal işindən, həmçinin səsvermənin münaqişəsiz şəraitdə keçməsindən söz açılır. Bir tərəfdən "ölkənin siyasi və ictimai həyatında bir partiyanın hakim mövqeyindən", digər tərəfdən isə "seçkilərdə bütün siyasi partiyaların iştirak etməsindən" danışmaq məntiqə sığmır", - deyə daimi nümayəndə bəyan edib.
"Ortaya sual çıxır. ATƏT DTİHB missiyasının "əsas komandasının" ekspertləri tərəfindən tərtib olunmuş aralıq hesabatlarının tənqidi qiymətlərinin xeyli miqdarda təkrar olunduğu bu rəylər tərtib olunarkən qısamüddətli müşahidəçilərin fikirləri nə dərəcədə nəzərə alınıb. Bütün bunlar bir daha ATƏT DTİHB-in metodologiyasının və praktikasının ciddi korrektəyə ehtiyacı olduğunu bariz surətdə sübut edir", - deyə Rusiya nümayəndəsi bildirib.
|
