Astana sammitinə qədər Ermənistan müəyyən addımlar atmalıdır

Rəsmi Bakı hesab edir ki, ATƏT-in Astanada keçiriləcək sammitinə qədər Ermənistan müəyyən addımlar atmalıdır. "Düşünürəm ki, bütün bu danışıqlar prosesi, həmsədrlərin də orada iştirakı, Rusiya prezidenti Dmitri Medvedevin fəal iştirakı elə bir situasiya yaradır ki, Ermənistan tərəfi öz mövqeyini bir daha götür-qoy edib, konstruktiv mövqe tutmaq üçün addımlar atmaq məcburiyyətində qalacaq, çünki qarşıdan ATƏT-in sammiti gəlir, o sammitə qədər müəyyən addımlar atılmalıdır" - bunu "Trend"ə müsahibəsində Azərbaycan, Rusiya və Ermənistan prezidentlərinin Həştərxan görüşünü şərh edən Prezident Administrasiyasının Xarici Əlaqələr Şöbəsinin müdiri Novruz Məmmədov bildirib.

ATƏT sammiti dekabrın 1-2-də Astanada keçiriləcək. Sammitdə təşkilata 56 üzv ölkənin, 12 tərəfdaş ölkənin dövlət və hökumət başçıları, eləcə də 68 beynəlxalq təşkilatın rəhbəri iştirak edəcək.

Məmmədov bildirib ki, Həştərxanda danışıqlar prosesində hər üç prezident xarici işlər nazirlərinə ATƏT sammitinə qədər müəyyən addımlar atıb, danışıqları davam etdirib, sammitə hər hansı bir məqamla gəlib çıxmaları ilə bağlı tapşırıqlar veriblər.

"Xarici işlər nazirlərinə tapşırıqlar verilib ki, danışıqlar aparsınlar, əllərindən gələni etsinlər ki, ora hər hansı bir nəticə ilə gəlib-çıxmaq mümkün olsun. Amma bu, mümkün olacaq, ya olmayacaq, demək çətindir. Ermənistan tərəfi hələ də özünün qeyri-konstruktiv mövqeyində israrla qalır. Ona görə də müəyyən səylər, cəhdlər göstərmək lazımdır. Bir tərəfdən iradə ortaya qoyulub, amma Ermənistan tərəfi də bütün bu situasiyanı, özlərinin indiki durumunu, gələcək taleyini ətraflı götür-qoy edib düşünməlidir. Burada təəssüf doğuran bircə məqam var. Rusiya prezidenti və xarici işlər naziri bu məsələdə çox fəaldırlar və bunu dəyərləndirmək, qiymətləndirmək lazımdır. Amma ABŞ-la Fransa tərəfi, çox təəssüflər olsun, belə fəallıq göstərmir, baxmayaraq ki, onlar Həştərxanda olan görüşlərin nəticələrini bəyənirlər", - Məmmədov əlavə edib.

PA rəsmisi Həştərxan görüşünü son 1 ildən artıq müddətdə RF prezidentinin özünün xüsusi, çox fəal iştirakı ilə təşkil olunmuş görüşlərin növbəti bir prosesi adlandırıb.

"Həştərxan görüşü də Rusiya Federasiyası prezidenti Dmitri Medvedev tərəfindən təşkil olunub. Məqsəd də budur ki, mürəkkəb, çətin danışıqlar prosesində irəliyə bir addım atılsın. Üç prezidentin yığışıb bir yerə gəlməsi adi hadisə deyil və hamı bilir ki, Azərbaycan prezidenti bu münaqişənin həlli ilə bağlı gedən danışıqlar prosesində irəliyə addım atılması üçün hər şeyi edir", - deyə Məmmədov qeyd edib.

N.Məmmədov prezidentlərin hərbi əsirlərin və həlak olanların cəsədlərinin qaytarılması ilə bağlı razılaşmanı mühüm hadisə hesab edir. "Bu, bir tərəfdən prezidentlər arasında ən kiçik səviyyədə olsa da, anlaşmanın mümkün olduğunu, bir-birlərinə qarşı inam, etimad tədbirlərinin baş tutduğunu və bu istiqamətdə işləməyin mümkün olduğunu bir daha göstərir. Həm də bizim Milli Qəhrəmanımız Mübariz İbrahimovun cəsədinin alınması məsələsi də mühüm hadisədir", - PA rəsmisi əlavə edib.

Xatırladaq ki, oktyabrın 27-də Həştərxanda Azərbaycan, Rusiya və Ermənistan prezidentlərinin görüşünün yekunu olaraq bəyannamə imzalanıb və həmin sənəd hərbi əsirlərin qaytarılmasını nəzərdə tutur, humanitar xarakter daşıyır. Dmitri Medvedevin sözlərinə görə, xüsusi bəyannamə etimad tədbirlərini möhkəmləndirməyə yönəlib.