Gələn ilin mayında Almaniyanın Düsseldorf şəhərində "Eurovision-2011" müsabiqəsində Azərbaycanı təmsil etmək üçün ABŞ müğənnisi Barklay Nikola Vilyams milli seçimlərdə iştirak edir. Etibarlı mənbədən aldığımız xəbərə görə, amerikalı müğənni milli seçimlərdə iştirak üçün bir neçə gün əvvəl Bakıya gəlib. Amerikalı müğənninin öz ölkəsini bir sıra beynəlxalq müsabiqələrdə təmsil etdiyi və uğur qazandığı bildirilir.
Gələn ilin mayında Azərbaycanı bu yarışmada təmsil etmək arzusunda olan 90-a yaxın iştirakçı arasında tanınmış simaların da olduğu təsdiqlənib. Onların sırasında müğənnilərdən Xəyyam Nisanov, Nurlan Növrəsli, "Azəri star" müsabiqəsindən tanıdığımız Emin Nəsirli, ötən il də milli seçimlərə qatılan Azad Şabanov, "Yeni ulduz" yarışmasından Lalə Məmmədovanın adını çəkmək olar. Milli seçimlərə sənədlərini verənlər arasında Almaniyada yaşayan həmyerlimiz və ötən il də seçimlərə namizədliyini irəli sürən Seyran İsmayılxanov da var. Bununla yanaşı, Azərbaycanın tanınmış bəstəkarı Rauf Hacıyevin nəvəsi Günay da "Eurovision-2011" müsabiqəsində ölkəmizi təmsil etmək istəyindədir.
Finlandiyada yaşayan azərbaycanlı sənətçi sənədlərini milli seçimlərə təqdim edib. Rusiyada yaşayan Sultan adlı azərbaycanlı gənc müğənni də namizədliyini irəli sürənlər arasındadır. Almaniyanın Düsseldorf şəhərində gələnilki "Eurovision"da Azərbaycanı təmsil etmək şərəfinə əməkdar artist Aybəniz Haşımovanın qızı Aynişan Quliyeva da namizədlərdən biridir. Yerli KİV-də xalq artisti Aygün Kazımovanın qızı İlqarənin milli seçimlərə qatılması ilə bağlı yazılanlar isə özünü doğrultmayıb. Belə ki, etibarlı mənbə İlqarənin bu seçimlərdə iştirak etmədiyini deyib. Hazırda Avropa Yayım Birliyinin üzvü və müsabiqənin Azərbaycan üzrə yayımçısı İctimai Televiziya və Radio Verilişləri Şirkəti (İTV), eyni zamanda buna aidiyyəti olan şəxslər ilkin müsahibədən uğurla keçən 90 nəfərə yaxın namizəd arasında seçim aparırlar. Əldə etdiyimiz məlumata görə, "Eurovision-2011" yarışmasında Azərbaycanı təmsil etmək istəyində olanlar arasında çoxsaylı istedadlı gənclər var. Milli seçimlər üzrə I mərhələyə noyabrın ilk ongünlüyündə start veriləcək.
Bu mərhələyə vəsiqə qazanan hər namizəd İTV-nin canlı efirində öz bacarıq və istedadlarını nümayiş etdirəcək. Ötənilki seçimlərdən fərqli olaraq bu il "Eurovision" təmsilçimizin seçilməsində tamaşaçılar da birbaşa iştirak edəcəklər. Seçimlər həm münsif heyətinin rəyi, həm də tamaşaçı səsverməsi ilə keçiriləcək.
|
