Türkiyənin İstanbul şəhərində fəaliyyət göstərən Türk Cümhuriyyətləri Birliyi Koordinasiya Mərkəzinin nəzdində "Qarabağ-Azərbaycan-İstanbul" Teatrı yaradılıb. Bu özəl qurum qardaş Türkiyədə Azərbaycan mədəniyyətinin təbliğinə xidmət göstərməklə, Qarabağ həqiqətlərini dünyaya yaymaqda müəyyən rol oynayacaq. Teatrın tamaşalarında iştirak etmək üçün türk aktyorlarla yanaşı, Azərbaycan sənətçiləri də dəvət olunublar. Musiqili Komediya Teatrının aktrisası, uzun illər Ağdam Dövlət Dram Teatrında çalışmış xalq artisti Fatma Mahmudova da bu məqsədlə İstanbula gedəcək.
Musiqili Komediya Teatrının mətbuat xidmətindən verilən məlumata görə, Fatma Mahmudova teatrın ilk tamaşasında ana surətini yaradacaq. Aktrisa yeni tamaşanın məşqlərində iştirak etmək üçün bu gün İstanbula yola düşüb. Xatırladaq ki, Fatma Mahmudova 1968-ci ildə Ağdam Dövlət Dram Teatrında aktrisa kimi yaradıcılığa başlayıb. Orada "Dağılan tifaq"da Sona xanım, "Fərhad və Şirin"də Məryəm, "Solğun çiçəklər"də Sara, "Qaçaq Nəbi"də Həcər, "Təhminə və Zaur"da Təhminə və s. obrazlar yaradıb. Aktrisa 1994-cü ildən Azərbaycan Dövlət Musiqili Komediya Teatrında çalışır.
|
