Akademik Opera və Balet Teatrının solisti, xalq artisti Mənsum İbrahimovun 50 illik yubileyi münasibəti ilə Abşeron rayon İcra Hakimiyyətinin təşkilatçılığı ilə Xırdalan mədəniyyət sarayında tədbir keçirilib. Tədbirdə Abşeron rayon İH başçısı Zakir Fərəcov, şair, professor Ənvər Əhməd, xalq şairi Nəriman Həsənzadə, xalq artistləri Tələt Qasımov, Ramiz Quliyev, Siyavuş Kərimi və digər sənət adamları, Abşeron ictimaiyyəti iştirak edib. Gecənin aparıcısı əməkdar artist Azad Şükürov olub. Tədbir əməkdar artistlər Elçin Həşimov, Elnur Əhmədovun Mənsum İbrahimov haqqında hazırladıqları 18 dəqiqəlik filmin nümayişi ilə başlayıb. Daha sonra xanəndənin yaradıcılığı barədə çıxışlar olub. Yubiley mərasimində Firuz Səxavət, Simarə İmanova, Təyyar Bayramov, İlkin Əhmədov, Elnur Zeynalov, Güllü Muradova və muğam müsabiqəsinin digər qalibləri öz mahnılarını səsləndiriblər. Sonda Mənsum İbrahimov tədbir təşkilatçılarına öz təşəkkürünü bildirib, sənət dostları Elçin Həşimov və Elnur Əhmədovun müşayiəti ilə "Şahnaz" muğamını ifa edib. Qeyd edək ki, Mənsum İbrahimovun yubileyinə həsr olunmuş rəsmi tədbir noyabrın 2-də Beynəlxalq Muğam Mərkəzində keçiriləcək.
|
