Dünyanın bir çox ölkələrində konsertlər verən Yaponiyanın məşhur pianoçusu Keiko Matsui oktyabrın 28-də Heydər Əliyev Sarayının səhnəsində konsert proqramı ilə çıxış edib. APA-nın məlumatına görə, Bakıda keçirilən Beynəlxalq Caz Festivalı çərçivəsində baş tutan bu konsertdə öz ifası və bəstələri ilə dünyaya səs salan Keiko Matsui Azərbaycan tamaşaçısına unudulmaz gecə bəxş edib.

Bakı səhnəsində pərəstişkarlarını Azərbaycan dilində salamlayan musiqiçi konsertində onu yalnız qoymayan çoxsaylı tamaşaçılara təşəkkür etməyi də unutmayıb: "Sizin gözəl və sevimli şəhərdə oxumaq, bu səhnədə çıxış etmək çox gözəl bir hissdir. Alqışlarınızı eşitmək və ürəkdən gələn sevginizi duymaq mənə çox xoşdur. Bu diqqətiniz üçün təşəkkür edirəm".

Caz Festivalı çərçivəsində keçirilən ən bahalı konsertlərdən biri hesab olunan və biletləri baha qiymətə satılan Keiko Matsuinin konserti alqışla baş tutub. Yaponiyalı pianoçu öz musiqiçiləri ilə bərabər uzun illərdir yaddaşlarda həkk olunan mahnıları canlı olaraq səsləndirib. Həm royal, həm də sintezatorda musiqiləri özünəməxsus ifa edən Keiko Matsuinin bütün çıxışları sürəkli alqışlarla müşayiət olunub. Musiqiçi hər alqış üçün dəfələrlə "bu, çox gözəldir, sizə çox-çox təşəkkür edirəm" deməyi də özünə borc bilib. Konsert proqramını Azərbaycanın tanınmış simaları, dövlət rəsmiləri, eləcə də çoxsaylı mədəniyyət və incəsənət xadimləri də izləyiblər.

Heydər Əliyev Sarayının səhnəsində quraşdırılmış böyük ölçüdə LED ekran vasitəsilə salonun arxa sıralarında əyləşən tamaşaçılar pianoçunun çıxışını aydın şəkildə izləmək imkanı qazanıblar. Saat yarımlıq proqram yekunlaşdıqdan sonra pianoçu tamaşaçıların sürəkli alqışlarına cavab olaraq bir neçə dəfə səhnəyə qayıdıb və hər qayıdışında tamaşaçılara yaddaqalan musiqi nömrələri ərməğan edib. Pianoçu sonda musiqiçilərin müşayiəti olmadan ona uğur gətirən məşhur kompozisiyanı royalda təqdim edib. Keikonu görkəmli saksofonçu Michael Ghegan, basist Mel Brown və ənənəvi yapon fleytaçısı Kazu Matsui müşayiət ediblər.

Keiko Matsui caz aləmində keçən yüzilin 80-ci illərinin ortalarından başlayaraq məşhurlaşıb. Əsasən caz-pop və fluyn üslubunda ifaçı kimi tanınmış Keiko Matsui Şərqin musiqi mədəniyyətinə sədaqətini qoruyub saxlayıb, orijinal bəstəkar və özünəməxsus vokalçı kimi də uğur qazanıb. Onun "A dror of Water" adlı ilk albomu ABŞ-da buraxılıb. "Dream Walk" lonqpleyi ən populyar caz albomları arasında ilk üçlüyə daxil olub. 1999-cu ildə Keiko "Oasis Awards" yarışmasının qalibi olub, onun "Light Above the Trees" klipi isə ən yaxşı videoklip mükafatına layiq görülüb. Onun bəzi kompozisiyaları lirik mahnılar kimi, digərləri kinofilmlərə etüdlər kimi səslənir.

"Bakı Beynəlxalq Caz Festivalı-2010" Mədəniyyət və Turizm Nazirliyinin, Azərbaycan Mədəniyyət Fondu, "Sweet rroduction"un birgə təşkilatçılığı ilə keçirilir. Festival oktyabrın 30-dək davam edəcək.