Akademik Milli Dram Teatrının aktrisası, Azərbaycanın xalq artisti Bəsti Cəfərova "Bir də dünyaya gəlsəydim, aktrisa olmazdım" deyir. Bu sözlərini əsaslandıran aktrisa xanım səbəblərə toxunur. Deyir ki, müxtəlif illərdə teatrda onun adına yazılan rollar sonradan əlindən alınaraq başqasına verilib. Buna baxmayaraq, şöhrət pilləsinə yaxınlaşan Bəsti xanım bunun üçün teatr səhnəsinə minnətdar olduğunu söylədi:

"Bəzi rollar kimlərinsə sayəsində əlimdən alınıb. Amma teatr sənətinə dərindən bağlandığım üçün üz döndərib getmək istəmədim. Hər şeyə dözdüm".

Basqılara sakit tərzdə yanaşan Bəsti xanım buna baxmayaraq, onunla ədavəti olan insanların sayının çox olduğunu deyir. Söyləyir ki, evdar qadın olsaydı, bəlkə də bunların heç birini yaşamazdı. Lakin teatrdakı uğurları başqalarının yuxusunu qaçırmaqla yanaşı, onlarda aktrisaya qarşı düşmənçilik hissi oyadıb:

"Sənətdə uğurlar kimlərdəsə həsəd yaradır. Bütün bunlara tab gətirmək üçün yalnız susdum. Amma susmağımdan da yararlananlar tapıldı. Əslində söz-söhbət bütün teatrların mətbəxində baş verir. Sadəcə, bunun hansı səviyyədə, kimlər tərəfindən aparıldığı kənardakı adama bəlli olmur. Düşünmüşəm ki, xalq artisti fəxri adını daşıyan, milyonlarla tamaşaçı auditoriyası olan sənətçi hər deyilən sözün arxasınca düşməməlidir. Mən bu xətti tutaraq uzun illər teatr sənətinə xidmət göstərdim".

Lakin aktrisa onun əlindən alınan rolların kimə həvalə olunduğunu söyləmək istəmədi. Bildirdi ki, bunu danışmaqla öz-özünü təkzib etmiş olur: "Çünki bir az əvvəl söz-söhbətlərə susaraq yanaşdığımı söyləmişdim. Əgər indi ad çəksəm, yeni qalmaqalın başlanğıcını qoymuş olaram. Bunu isə istəmirəm. Sadəcə, teatr kollektivini yaxından tanıyan adamlara söhbətin təxminən kimlərdən getdiyi bəllidir".

Söhbətinin davamında Bəsti Cəfərova səhnə fəaliyyətinin onun həyatında açdığı zolaqların ağ və qara rənglərdən ibarət olduğunu deyir. Şəxsi həyatının da eyni rənglərlə müşayiət olunduğunu deyən aktrisa yaşamağı üçün bir səbəbi olduğunu dedi. O, aktrisanın yeganə qız övladıdır:

"Həyatımın bir qolunu qızımın xoşbəxtliyi üzərində qurdum. Çünki mənim çəkdiyim əziyyətləri onun təkrarlamasını istəmirəm. Bu gün o, mənim yaşamağım üçün bir bəhanədir".

Vaxtı ilə sənətdə göstərdiyi fədakarlığı bəzən peşmanlıq hissi ilə xatırlayan Bəsti xanım: "Hələ tələbə ikən yaxın gələcəkdə böyük səhnələr fəth edəcəyimi görə bilirdim. Hisslərim məni yanıltmadı. Mənim bazam gözəlliyim yox, birbaşa istedadım idi. Düzdür, mənə vizit kartlarını göndərənlər, sevgilərini bildirənlər çox olub. Amma bu cür aldadıcı gələcək mənə lazım deyildi. Zəhmətimi əllərimin qabarı ilə qazandım. Amma hərdən peşman olduğumu anlayıram. Buna isə mənə qarşı haqsızlıqlar səbəb olub", - deyə aktrisa bildirdi.