Media Mərkəzində Sevinc Hacıyevanın Bakı Xoreoqrafiya Məktəbindən xaric edilməsilə bağlı mətbuat konfransı bu məktəbdə baş verən qəribə proseslərə işıq saldı.
Hüquq müdafiəçisi Ələkbər Məmmədov Sevinc Hacıyevanın anası Reyhan Hacıyevanın deputat Mehriban Əliyevaya müraciətindən sonra uşağın məktəbə götürüldüyünü xəbər verib. Hazırda 4-cü sinifdə oxuyan S.Hacıyevanı məktəbin direktoru Nilufər Kərimova sentyabrın 14-dən məktəbə buraxmırmış. Səbəb olaraq şagirdin 3-cü sinfin yaz tədris proqramını yerinə yetirməməsini, imtahanlardan 2 almasını göstərir.
Şagirdin anası R.Hacıyeva da qızının ümumi bilik dərslərindən zəif oxumağını desə də, amma bu zəifliyin heç də sinifdə qalması və ya məktəbdən xaric edilməsi səviyyəsində olmadığını bildirib. "Əgər Sevinc zəif idisə, bu 3 ildə niyə zəif olmadı və birdən-birə 3-cü sinfin ikinci yarısında bu zəiflik üzə çıxdı?", - deyə R.Hacıyeva qızının imtahanlardan kəsilməsilə barışmadığını bildirib. O həm də qızından təkrar imtahan götürülmədiyindən şikayət edib.
Daha sonra R.Hacıyeva qızının məktəbdən çıxarılmasına səbəb kimi heç də zəif oxumasını yox, ... pul vermədiyini iddia edib. Onun sözlərinə görə, imkanı olmadığı üçün digər valideynlər kimi müəllimlərə və ya direktora pul verə bilməyib... Həm də məktəb direktorunun 9 yaşlı uşağı məktəbdən çıxarmaq üçün dərsləri pozmaqda ittiham etməsini, sadəcə, təzyiq, uşaq haqlarının pozulması adlandırıb. Bununla bağlı uşaq hüquqlarını müdafiə təşkilatlarına müraciət etsə də, müraciətlərə cavab verilmədiyini (?) nəzərə çatdırıb.
R.Hacıyeva uşağın haqlarının müdafiəsi üçün məktəbin tabe olduğu Mədəniyyət və Turizm Nazirliyinə müraciət etsə də, qaneedici cavab almadığını (?) bildirib. R.Hacıyeva qızının həmçinin "Ölüm növbəsi" bədii, "Qara dəftər" sənədli filmində çəkildiyini, skripka alətində ifa bacarığının olduğunu söyləməklə məktəb direktorunun əsassız qərar qəbul etdiyini nəzərə çatdırmaq istəyirdi. Övladını tək ana kimi böyüdən R.Hacıyeva onun təhsilini davam etdirməsi üçün bütün imkanlardan istifadə edəcəyini söyləyir.
|
