Noyabrın 9-da Azərbaycanda I Bakı Beynəlxalq Teatr Konfransı öz işinə başlayır. Mədəniyyət və Turizm Nazirliyinin təşkil etdiyi bu konfrans öz işini Azərbaycan Dövlət Akademik Milli Dram Teatrının əsaslı təmir olunmuş yeni binasında quracaq. Bu, təmirdən sonra teatrda keçirilən ilk tədbir sayılacaq. Konfransda müxtəlif ölkələrin tanınmış rejissorları, prodüserləri, teatr təşkilatları rəhbərləri, teatrşünasları iştirak edəcək. Beynəlxalq konfrans iki gün davam edəcək.
Qeyd edək ki, 138 illik tarixi olan Azərbaycan teatr sahəsində ilk dəfədir belə bir konfrans keçirilir. Teatrın açılışından sonra bir sıra yeni tamaşaların hazırlanması nəzərdə tutulub və rəhbərlik teatra peşəkar aktyor heyəti dəvət edir. Bunların sırasında xalq artisti Fəxrəddin Manafovun da adı çəkilir. Təklif ona teatrın rəhbəri İsrafil İsrafilovdan gəlib.
Aktyor bildirib ki, direktorun bu təklifini artıq qəbul edib:
"Mən o təklifi artıq almışam. Düşünürəm ki, gələcəkdə elə bir tanınmış və məni maraqlandıran bir əsər olsa, güman ki, bu işə "hə" deyərəm. Ancaq bu, müqavilə yolu ilə olacaq. Təklif edirlər, dəvət edirlər, əgər sən onları qane edirsənsə, əgər səni əsər, rejissor, qoyulan məqsəd qane edirsə, çalışırsan. Mən böyük məmnuniyyətlə bu təklifi qəbul etmişəm və təbii ki, gözləyirəm. Vaxt gələndə, hələ də tələb olunan aktyor olaramsa, işləyərəm. Onu da deyim ki, İsrafil İsrafilov teatrı gözəl bilən professional bir insandır, teatrşünasdır. Uzun illərdir teatr sahəsində çalışır. Tofiq Kazımov kimi dahi bir insanın tələbəsi, köməkçisi olub. Teatrdan həddən artıq xəbərdar olan biridir. Onun ora təyin olunması böyük bir hadisə, düzgün, dəqiq bir işdir".
|
