Oktyabrın 25-də Muğam Teatrında əməkdar artist Baloğlan Əşrəfovun solo konserti keçiriləcək. Sənətçi tamaşaçılar qarşısına yeni repertuarla çıxacaq. Müğənnini hər zaman olduğu kimi, öz ansamblı müşayiət edəcək.
Muğam Teatrının direktoru Arif Qazıyevin açıqladığına görə, teatrda mütəmadi olaraq keçirilən bu kimi konsertlərdən fərqli olaraq, budəfəki konsert pullu olacaq. Biletləri 30 manata satmaq nəzərdə tutulur:
"Onu deyə bilərəm ki, tamaşaçılar konsertdən xüsusi zövq alacaq. Mahnıların hamısı canlı səslənəcək. Fonoqramdan qətiyyən istifadə olunmayacaq. Konsert axşam saat 9-da başlayacaq və 2 saat davam edəcək". Arif Qazıyevin sözlərinə görə, teatrda həftədə bir dəfə bu kimi konsertlərin təşkili planlaşdırılır. Bundan başqa, gələn ay Muğam Teatrı Arif Babayevin yaradıcılıq, Əbülfət Əliyevin, Qulu Əsgərovun xatirə gecələrini keçirəcək.
|
