Əməkdar artist, xanəndə Təyyar Bayramov Müslüm Maqomayevin 125 illik yubileyinə həsr olunmuş tamaşada növbəti dəfə Şah İsmayıl kimi səhnəyə çıxdı. Artıq 2005-ci ildən bu rolu, demək olar, dublyorsuz oynayan Təyyar Bayramov bu dəfə də böyük tamaşaçı alqışı qazandı. Xalq artisti Mənsum İbrahimovu səhnəmizin Məcnunu adlandırdıqları kimi, Təyyar Bayramovu da opera səhnəmizin bugünkü Şah İsmayılı adlandıranlar az deyil. Təyyarla söhbət zamanı əməkdar artistin Çinə səfəri ərəfəsində olduğunu öyrəndik. Muğam ifaçısı səfər öncəsi yeni layihələri və səfərin məqsədi barədə açıqlama verdi. Xanəndə bildirdi ki, Şanxay şəhərinə Azərbaycandan böyük bir mədəniyyət heyəti gedir. Səfərin məqsədi Azərbaycan mədəniyyətini, incəsənətini və milli mətbəximizi təbliğ etməkdir. Yeri gəlmişkən onu da öyrəndik ki, heyətin sıralarında Azərbaycan Kulinariya Mərkəzinin prezidenti Tahir Əmiraslanov da iştirak edir. Təyyar Bayramov səfər zamanı bir neçə konsert proqramı ilə çıxış edəcəklərini qeyd etdi. Dünyanın bir çox ölkələrinin iştirak edəcəyi ənənəvi mərasimdə Azərbaycandan gedən incəsənət nümayəndələri Azərbaycan mədəniyyətini yüksək səviyyədə nümayiş etdirmək üçün hazırlaşıblar. Təyyar Bayramov konsert proqramında muğam dəstgahı və xalq mahnısı ifa edəcəyini qeyd etdi. Shanxay,medeniyyet,tedbir
|
