Bakıda taksi xidmətinin keyfiyyətini yaxşılaşdırmaq üçün Avropa standartlarına cavab verən müasir avtomobillər gətirilib. Ötən gün nəqliyyat naziri Ziya Məmmədov TX4 və ya "London Taksi" adlanan 12 belə avtomobili dövlət başçısı İlham Əliyevə təqdim edib.

Məlumata görə, bu taksilər müasir kommunikasiya texnologiyaları əsasında işləyəcək. Gecə-gündüz işləyən dispetçer mərkəzi sifarişləri on-line rejimində qəbul edəcək.

Təklif olunan xidmətlər sırasında taksidən istifadə edən hər bir sərnişinin qəza zamanı 3 min manat sığortalı olması və maşınlarda "itmiş əşyaların tapılma" xidmətinin fəaliyyət göstərməsi də var.

Hər avtomobildə sürücülər üç növbədə işləyəcəklər. Onlar "London Taksi" şirkətinin mütəxəssisləri tərəfindən sürücülük və davranış təlimləri keçiblər ki, bu da sərnişinlərə yüksək səviyyədə xidmət göstərməyi təmin edəcək.