Bu gün Azərbaycan Xalq Cəbhəsi Partiyasının (AXCP) növbəti qurultayıdır Partiyanın bütün mühüm məsələlər üzrə mövqeyi müəyyən ediləcək. Bunu AXCP sədri Əli Kərimli bildirib.
Onun sözlərinə görə, qurultayda partiyanın rəhbər orqanlarının seçilməsi ilə yanaşı, Qarabağ problemi, ölkədə sosial-iqtisadi vəziyyət, parlament seçkiləri üzrə qərarlar qəbul ediləcək.
Bundan başqa, qurultay AXCP və Müsavat Partiyasının birləşməsi kimi mühüm məsələyə münasibət bildirəcək. Kərimli qurultay nümayəndələrinin ölkədə vəziyyəti əsaslı şəkildə dəyişə biləcək bu ideyanı dəstəkləyəcəklərindən əmin olduğunu bildirib.
"Partiyaların birləşməsi ideyasına müsbət yanaşma olarsa, birləşdirici qurultay keçiriləcək və müvafiq qərar qəbul ediləcək. Aydındır ki, bu qurultay artıq parlament seçkilərindən sonra keçiriləcək", - deyə qeyd edən Ə.Kərimli AXCP-nin qurultayının "Müstəqillik əldə etdik, demokratiya da quracağıq" şüarı altında keçiriləcəyini də vurğuladı. Habelə qurultayda Ə.Kərimlinin hesabat xarakterli məruzəsində ölkədə siyasi vəziyyət qiymətləndiriləcək və böhrandan çıxış yolları təklif ediləcək.
Ə.Kərimlinin fikrincə, cəmiyyətdə süstlük mövcuddur. Amma hesab edir ki, elə bu vəziyyətdən də cəmiyyət özü çıxmalıdır və bu işdə qurultay partiyanı mübarizəyə səfərbər etməlidir.
"Prinsipial mövqeyimiz ondan ibarətdir ki, Azərbaycanda demokratik dövlət qurulmalı və xalqın hakimiyyəti seçkilər yolu ilə dəyişmək imkanı olmalıdır. Hakimiyyət bunu istəmir və buna görə bizi radikal müxalifət adlandırır", - deyə Ə. Kərimli bildirib.
Parlament seçkilərinə toxunan Kərimli qeyd edib ki, "AXCP-Müsavat" seçki bloku artıq 125 dairədən, demək olar ki, 100-ü üzrə vahid namizədlərini razılaşdırıb və bu proses davam edir. Habelə 7 dairədə blok müstəqil namizədləri dəstəkləyəcək.
Blok elə bir kampaniya təşkil etmək niyyətindədir ki, namizədlərin seçki qərargahları hər bir evi və mənzili əhatə etsin. Bununla yanaşı, seçkiqabağı təşviqat KİV və qapalı yerlərdə mitinq və toplantılarda seçicilərlə birbaşa görüşlər vasitəsilə bütün mümkün yollarla aparılacaq. Kərimli seçkilərdə təbliğatla bağlı yeni texnologiyalardan istifadə edəcəklərini və bu işə yalnız seçkilərə 23 gün qalmış start verəcəklərini qeyd etdi.
AXCP sədri Azərbaycanda seçkiöncəsi durumun kifayət qədər kafi olmağına baxmayaraq, 7 noyabr parlament seçkilərində ən azı 75 dairədə qələbə qazanacaqlarını da bildirdi.
|
