Yaxın zamanlarda Azərbaycanda ictimai yerlərdə siqaret çəkilməsinə qanunla qoyulan yasaqların tətbiqinə başlanacaq. Hökumətdəki mənbədən "Ayna"ya daxil olan məlumata görə, təhsil ocaqlarında və onlara yaxın ərazilərdə, istirahət parklarında, qapalı restoranlarda və digər yerlərdə siqaret çəkənlər İnzibati Xətalar Məcəlləsinə əsasən cərimələnəcək. Ən ciddi cərimələrə isə azyaşlılara siqaret satan şəxslər məruz qalacaq. Bir neçə dəfə və bilərəkdən yasağı pozanlara qarşı isə cinayət işi də açıla bilər.
Belə ki, artıq bu gerçəkdən mütərəqqi və həyati baxımdan zəruri addım Naxçıvan Muxtar Respublikasında tətbiq edilməyə başlanıb. Hələlik Muxtar Respublikada iri ticarət obyektlərində siqaret çəkmək yasaq edilib. Amma gələcəkdə siqaret çəkilməsinin Muxtar Respublikanın bütün ünvanlarında qadağan ediləcəyi gözlənir.
Belə ki, mümkün yasaq artıq iri siqaret istehsalçılarını narahat etməyə başlayıb və onların bu yasağa qarşı müxtəlif şəkillərdə kampaniya aparmağa girişəcəkləri proqnozlaşdırılır.
Yeri gəlmişkən, Milli Məclisin bir neçə deputatı, özəlliklə də Qənirə Paşayeva siqaret əleyhinə ciddi kampaniya aparır. Amma son günlər bəzi kütləvi informasiya vasitələri və xüsusilə ATV kanalı dolayısı ilə siqareti reklam etməyə başlayıb. Belə hesab etmək olar ki, siqaret istehsalçıları artıq hərəkətə keçiblər. Məsələn, telekanalın aparıcısı Elçin Əlibəyli "El içində" verilişinin son nümayiş olunan buraxılışını siqaret çəkmək və ya çəkməmək məsələsinə həsr edib. Aparıcının özü və bəzi qonaqları, habelə çox titullu tibb alimi kimi təqdim etdiyi yaşlı adam da siqaretin insan səhhətinə ziyan vurmadığını "sübut etməyə" çalışıblar.
Eyni zamanda, sözügedən telekanalın digər şoularının birində müğənni Aygün Kazımova bu şou-proqrama "nədənsə" məhz siqaret çəkdiyi "trubka"sını hədiyyə edib və aparıcı Nanə xanım az qala bu hədiyyəni analoqu olmayan yüksək karatlı brilyant kimi qəbul edib. Elə həmin şounun digər qonağı müğənni Nisə Qasımova ilə söhbət dolayısı ilə siqaretin insana faydası üzərində qurulub. Hətta rejissor Kənan M.M.-in Nisə xanımı vəsf edən şeirində də siqaretin bu müğənninin həyatındakı əvəzolunmaz roluna ayrıca toxunub və müğənninin özü də siqareti dinləyicilərə az qala özünün "xilaskar"ı kimi təqdim edib.
Hər halda, adıçəkilən telekanalda siqaretin təbliğ olunmasının naşılıq, savadsızlıq, təsadüfdən və ya bilərəkdən müəyyən ödənişlər qarşısında aparıldığı istisna deyil. Amma onu da yaddan çıxarmamalıyıq ki, Azərbaycanda siqaretin istənilən formada reklamı qanunla yasaqdır.
Hansısa zəhərli maddələrlə zəngin bir bitkinin yarpağının kağızda və ya qəlyanda yandırılaraq tüstüsünün ciyərlərə doldurulmasının insanın özü və onun əhatəsindəkilər üçün nə kimi fəsadlara yol açdığı dünyanın öncül ölkələrinin təbabət elmi tərəfindən min dəfələrlə sübut olunub və Qərb dünyası bu gün siqaretin fəsadlarından xilas olmaq üçün hətta ən radikal addımlara gedir. Özü də etirazlardan çəkinmədən və inadkarcasına. Misal üçün, Türkiyə. Bizim ölkədə isə hər işdə olduğu kimi gecikirik. Siqaretə yasaqlar millətin fiziki xilas məsələsi olduğunu unutmamalıyıq.
|
