Ötən gecə Lənkəran rayonunun Qumbaşı kəndində silahlı insident baş verib. "Ayna"ya daxil olan məlumata görə, gecə saat 00.15-də bir neçə minik maşınında Masallıdan gələn bir qrup şəxs "Əhya" gecəsi münasibəti ilə məsciddə toplaşmış adamlara odlu silahdan atəş açıb.

Nəticədə Qumbaşı kəndinin sakini, 1969-cu il doğumlu Elşən Hüseynov həlak olub. Döş qəfəsindən yaralanan Ramin Ağamalıyev isə Lənkəran rayon xəstəxanasının reanimasiya şöbəsinə yerləşdirilib. "Ayna"ya Lənkəran prokurorluğundan bildiriblər ki, cinayətin motivləri araşdırılır.

"Ayna" qəzeti hadisələrin təfərrüatlarını öyrənib. Məsciddə baş vermiş silahlı insident dini deyil, kriminal xarakter daşıyır. Belə ki, Qumbaşı kəndində qeydiyyatda olan, Bakı şəhərində yaşayan, əvvəllər məhkum olunmuş Şirəliyev Emin Gülağa oğlu Masallı rayonundan olan bir nəfərin şəxsi maşınını və qızıl əşyalarını zorla əlindən alıb. Yerli sakin Rahib Haşımovun "Ayna"ya verdiyi məlumata görə, bundan sonra Şirəliyev Qumbaşı kəndinə gəlib. Masallının kriminal dairələri "razborka"nı həll etmək üçün Qumbaşıya gəliblər və Eminin üzə çıxmasını tələb ediblər. Dünən gecə yenidən kəndə qayıdan Masallı sakinləri Eminin məsciddə gizləndiyini güman edərək ora üz tutublar. Əhya gecəsi münasibəti ilə məsciddə olan gənclər və yeniyetmələrdən Emini tələb ediblər. Bu zaman məsciddə namaz qılmağa gəlmiş Hüseynov Elşən Əhliman oğlu gələnlərə Eminin burada olmadığını və təhqirləri yığışdırmığı tələb edib. Bu zaman gələnlərdən biri söyüş söyərək "vurun bunu" qışqıraraq "Vinçestr" markalı silahdan atəş açıb. Nəticədə Elşən həlak olub. Bundan sonra məsciddə olan digər yeniyetmə Ağamoğlanov Ramin qaçaraq evdən köhnə xəncərlə cumarkən gələnlər ona da bir güllə vurub yaralayıblar. Bundan sonra gələnlər qaçıb aradan çıxıblar. Lənkəran polisi hadisədə iştirakı olan bir neçə nəfəri həbs edib.

Daha sonra məlum olub ki, Lənkəranda baş vermiş silahlı insidentlə bağlı iki nəfər saxlanıb. Onlar Masallı rayon sakinləri Emil Bağırov və Ramil Hümmətovdur. Bu barədə DİN mətbuat xidmətindən "Ayna"ya məlumat verilib. Digər şübhəlilərin də tutulması üçün əməliyyat-axtarış tədbirləri həyata keçirilir.