Azərbaycan paytaxtında bu ilin avqust ayında "Təmiz hava" aylığı keçirilib. Aylıq çərçivəsində ixrac etdiyi qazların tərkibində normadan artıq zərərli maddələr aşkarlanan avtomobillər saxlanılıb, 2500 sürücü inzibati qaydada cərimə olunub. Bu barədə cümə günü "Trend"ə Bakı şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi Cəmşid Hənifəyev danışmışdır.

Hənifəyevin sözlərinə görə, atmosfer havasının çirklənməsinin qarşısını almaq istiqamətində avqustun 1-dən 31-dək paytaxt ərazisində yerləşən avtomobil təsərrüfatlarında və yollarda müvafiq tədbirlər həyata keçirilib.

Şöbə rəisi bildirir ki, reydlər zamanı 35 avtonəqliyyat müəssisəsinə baxış keçirilib. Yoxlamalar zamanı müəssisələrdə 1001 avtomobildən 278-nin mühərriklərinin işlənmiş qazlarında zərərli maddələrin miqdarının normativ həddən artıq olduğu aşkar olunub. Profilaktik işlər aparılaraq 191 avtonəqliyyat vasitəsində karbonoksigenin (CO) miqdarı norma həddinə endirilib.

Bakıda avtotəsərrüfatı olan müəssisə, idarə və təşkilatlarda avtomaşınlar ay ərzində yoxlanılıb, xaricdən gətirilmiş xüsusi qurğularla nəqliyyat vasitələrinin mühərriklərinin işlənmiş qazlarında zərərli maddələrin miqdarı müəyyən edilib.

Aylıq çərçivəsində Bakının küçə və magistral yollarında reydlər zamanı 6000 avtomobildən 2151-də mühərriklərin işlənmiş qazlarında CO-nun və tüstünün miqdarının normadan artıq olduğu aşkar olunub. Bu avtomobillərin sürücüləri barəsində Dövlət Yol Polisi İdarəsinin əməkdaşları tərəfindən protokollar tərtib edilərək inzibati qaydada məsuliyyət tədbirləri tətbiq edilib.

Atmosferə normadan artıq zəhərli maddələr buraxan nəqliyyat vasitələri sürücülərinin əməli İnzibati Xətalar Məcəlləsinin 155.2.1-ci maddəsi ilə tövsif olunur. Həmin maddəyə görə, nəqliyyat vasitələrinin sürücüləri tərəfindən mühərriki nasaz olan və belə nasazlığın aradan qaldırılması mümkün olmayan nəqliyyat vasitələrinin istismarı pozuntu hesab olunur və 20 manatdan 30 manatadək cərimə nəzərdə tutulur.

Bundan başqa, atmosfer havasının avtonəqliyyat vasitələri ilə normadan artıq çirkləndirilməsi ilə bağlı 18 müəssisəyə qarşı 540 manat məbləğində iddia qaldırılıb, 1250 manat məbləğində ödəmə tətbiq olunub. Bu barədə cümə günü Ekologiya və Təbii Sərvətlər Nazirliyinin (ETSN) rəsmi saytında yayılan məlumatda deyilir.

Aylıq çərçivəsində ETSN və yol polisi əməkdaşları tərəfindən birlikdə aparılan yoxlamalar zamanı Dövlət Xəzər Dəniz Gəmiçiliyinin avtobazasında beş, Dövlət Torpaq və Xəritəçəkmə Komitəsinin avtoparkında dörd, "Körpü-Bina-Tikinti" MMS-nin qarajında doqquz, "Bakı Yükdaşıma Nəqliyyat" ASC-nin qarajında üç, "Qum adası" NQÇİ-də üç, "Azneft" İB-nin Dalma Qurğularının Təmiri və Kirayəsi üzrə Eksperimental Müəssisəsində yeddi avtonəqliyyat vasitəsi "zay" çıxıb. Həmin müəssisələrə qarşı ətraf mühitə dəymiş zərərin ödənilməsi məqsədilə müvafiq iddialar irəli sürülüb.

Ekologiya və Təbii Sərvətlər Nazirliyinin məlumatına görə, Azərbaycanda atmosfer çirklənməsinin 60 faizdən çoxu nəqliyyat vasitələrinin payına düşür.