Ordumuz daha bir əsgərini itirdi. APA-nın məlumatına görə, hadisə sentyabrın 2-də Müdafiə Nazirliyinin Naxçıvan Muxtar Respublikasında yerləşən "N" saylı hərbi hissəsində baş verib. Kürdəmir rayon Hərbi Komissarlığından həqiqi hərbi xidmətə çağırılmış Cavad Abdullayev (1992) xəstəlikdən dünyasını dəyişib.
Müdafiə Nazirliyi mətbuat xidmətindən APA-ya faktı təsdiqləyiblər. Bildirilir ki, əsgər Cavad Abdullayevin ölümü ilə nəticələnən xəstəliyin səbəbləri həkim tibbi ekspertizası tərəfindən araşdırılır.
Bununla da Azərbaycan Silahlı Qüvvələrinin 2010-cu ildəki itkilərinin sayı 60-a yaxınlaşıb. Bu barədə "Doktrina" Jurnalistlərin Hərbi Araşdırmalar Mərkəzindən "Ayna"ya bildirilib. Məlumatda o da qeyd olunur ki, itkilərin təxminən 12-si döyüş (düşmən gülləsi), 48-i isə qeyri-döyüş itkiləridir. Müvafiq dövrdə yaralananların və xəsarət alanların sayı isə 50 nəfərdən artıqdır.
"Bu göstəricilər 2003-cü ildən bu yana ən böyük göstəricilər hesab edilə bilər" deyə məlumatda bildirilib.
"Doktrina" mərkəzi itkilərlə bağlı 2010-cu ilin 9 aylıq yekunlarına dair hesabatı oktyabrın əvvəllərində ictimaiyyətə açıqlayacaq.
|
