Xaricdə təhsil almış və işləmiş bir qrup fəal gənc parlament seçkilərində iştirak etməyi qərara alıb və bu məqsədlə "Gənc Azərbaycan" seçki bloku yaradıblar. Gənclərin "Turan"a verdiyi məlumata görə, hələlik onlar üç nəfərdir: Natiq Bayramov - ADİU-də və ABŞ-ın Marşaltaun Kollecində təhsil almışdır. Belçikada Azərbaycanlı Tələbələrin Avropa Forumunun baş katibi olub. Fransada Azərbaycanlı Vətəndaşların Avropa Forumunun qurucusudur. Namizədliyini 53 saylı Quba-Qusar seçki dairəsindən irəli sürəcək.
Bəxtiyar Hacıyev - Harvard Universitetinin İctimai Siyasət üzrə magistratura proqramının məzunudur. Əvvəllər beynəlxalq tələbə təşkilatının Azərbaycan nümayəndəliyinin qurucusu, BMT Baş Assambleyasında Azərbaycanın gənc nümayəndəsi olub. Namizədliyini 17 saylı 3-cü Yasamal dairəsindən irəli sürəcək.
Azad Namazov - Türkiyənin Boğaziçi Universiteti və ABŞ-ın Florida Universitetinin məzunudur. Namizədliyini 47 saylı Mingəçevir seçki dairəsindən irəli sürəcək.
Blok üzvləri ölkədə baş verən dəyişikliklərin "Həqiqət, Ədalət, Ləyaqət" kimi təməl dəyərlərə əsaslanaraq, vətəndaşların həyat səviyyəsinin yüksəldilməsi, daha yaxşı təhsil və səhiyyə xidməti ilə təmin edilməsi, eləcə də ölkədə hüquqi dövlət quruculuğu, məhkəmə sistemində islahatlar, inhisarçılıq və korrupsiya ilə effektiv mübarizə, demokratikləşmə prosesinə töhfə vermək niyyətindədirlər. Blok qarşıdan gələn seçkilərə "Müsbət dəyişiklik" ismarıcı ilə gedəcək.
"Gənc Azərbaycan" blokunun üzvləri hesab edirlər ki, Milli Məclisə seçiləcək müstəqil gənc millət vəkilləri siyasi iradə nümayiş etdirməklə köhnə problemlərə yeni, davamlı və qısa müddət ərzində nəticə verən həll yolları tapa bilər, vətəndaşlarımızın rifahını yüksəldən addımlar ata bilərlər. Eyni zamanda, blok üzvləri ölkəmizdən kənarda siyasət, iş, media və akademik sahədə malik olduqları şəxsi əlaqələr sayəsində işğal olunmuş ərazilərimizin işğaldan azad edilməsi başda olmaqla, Azərbaycanın milli maraqları uğrunda fəaliyyətlərini daha da səmərəli davam etdirərək, daha uğurlu nəticələr əldə edəcəklərinə inanırlar.
Seçkilərə start verilənə qədər bloka yeni namizədlərin qoşulacağı gözlənir.
|
