Dünən Reportyorların Azadlıq və Təhlükəsizlik İnstitutunda Media Hüquqları İnstitutunun KİV-də seçkiqabağı təşviqat üzrə qanunverici mexanizmlər sahəsində islahatlarla bağlı təkliflər paketinin təqdimatı keçirilib.
Tövsiyələr mövcud qanunvericiliyin, habelə çap və elektron KİV-in iki il ərzində həyata keçirilən monitorinqinin nəticələri əsasında hazırlanıb. Layihə Avropa Komissiyasının maliyyə dəstəyi ilə "Azad dalğalar" layihəsi çərçivəsində hazırlanıb.
Media Hüquqları İnstitutunun nümayəndəsi Xalid Ağaliyev Seçki Məcəlləsinə seçki kampaniyasının KİV-də işıqlandırılması haqqında xüsusi bənd daxil edilməsi zərurətini xatırladıb.
Təşviqat kampaniyasının müddətinin 23 günə qədər azaldılması ilə bağlı deyir:
"Bəlkə də bu, inkişaf etmiş demokratiyası və seçkilər sistemi olan ölkələr üçün qəbul edilə bilər, amma Azərbaycan üçün qətiyyən. Bu müddəti ən azı 45 günə qədər artırmaq lazımdır".
Onun fikrincə, pulsuz efir vaxtını 3 saatdan 12 saata qədər artırmaq lazımdır, belə ki, bu, çox azdır və bir çox siyasi qüvvələri qane etmir. Bundan başqa, pulsuz efir vaxtı yalnız bir kanalda - İTV-də verilir.
Xalid Ağaliyev həmçinin xatırladıb ki, pulsuz efir vaxtı saat 18-19-da verilir, amma onun saat 20-22-yə keçirilməsi daha yaxşı olardı. Adətən pulsuz efir debatlar üçün ayrılır, amma Ağaliyevin fikrincə, başqa seçkiqabağı təşviqat formalarına da ehtiyac var.
RATİ rəhbəri Emin Hüseynov isə öz növbəsində hər bir telekanalın proqramına təşviqat kampaniyası və siyasi reklam üçün icbari olaraq pullu efir vaxtı daxil edilməsi zərurətini qeyd edir.
Bundan başqa, seçki prosesində ədalətlilik və balansın izlənməsi üçün Media qrupu yaradılmasıının vacibliyi də vurğulanıb.
|
