Dünən media orqanlarını, İnternet saytlarını Azərbaycanın ən hündür bayrağının bir gün ərzində cırılması və endirilməsi xəbəri bürüdü. Bu xəbərin təsdiqini isə ilk olaraq bloqlarda yer alan şəkillər və videolar sübut etdi. Son vaxtlar müxtəlif bloqlarda ən maraqlı və operativ xəbərlərin daha çox yayılmasının şahidi oluruq. Bu da Azərbaycanda yeni media ənənələrinin oturuşması, onların sürətli inkişafından xəbər verir.

Amma bu sahənin də problemləri az deyil. Məhz həmin problemləri müzakirə etmək, onların həll yollarını aramaq məqsədilə sentyabrın 10-12-də Azərbaycanda ilk dəfə "BLOQOSFER 2010" adı altında forum keçiriləcək. Adından da göründüyü kimi, bu tədbir öz ətrafında bütün Azərbaycan üzrə bloqçular və yeni media mütəxəssislərini toplayacaq. Toplantının təşkilatçılarından biri - İnternet Texnologiyaları, İnternet və Media Birliyinin layihə meneceri Azər Nəzərov deyir ki, əsas məqsəd bloq sektorunun cəmiyyətə verəcəyi faydanın artırılması, bu sahənin inkişafını əngəlləyən halların aradan qaldırılması üçün bir araya gəlib müzakirələr açmaqdır:

"Əksər xarici ölkələrdə olduğu kimi, Azərbaycanda da yeni media və yeni media vasitələrinin sürətli inkişafı gedir. Bu da həmin sektora olan marağı artırır, medianın bu növü ilə məşğul olan mütəxəssislərin sayı durmadan artır. Lakin etiraf edək ki, bu cür təsir gücünə malik olan sektora marağın artımı özünü təkcə kəmiyyətdə deyil, keyfiyyətdə də göstərməlidir".

Azər Nəzərov deyir ki, həm kəmiyyət, həm də keyfiyyət artımlarını əngəlləyən bir çox obyektiv və ya subyektiv məsələlər var. Və bu məsələlərin ilk olaraq elə yeni media istifadəçilərinin özləri tərəfindən müzakirəsi çox vacibdir:

"Azərbaycanda bloqçuluq kifayət qədər inkişaf edib, sadəcə, dünyanın digər ölkələrindən fərqli olaraq, bizdə bloqçulara münasibət mənfidir. Xüsusilə Emin Milli və Adnan Hacızadənin həbsindən sonra buna qarşı təbliğat aparılır. Hətta bəzi müxalifət partiyalarının və QHT-lərin də bizə münasibəti yaxşı deyil".

A.Nəzərovun fikrincə, nəyə görəsə Azərbaycanda bloqçulara hökumət əleyhinə çıxan təbəqə kimi yanaşırlar, onların fəaliyyətini siyasiləşdirirlər:

"Amma bloqçu siyasətçi deyil, sadəcə, öz fikirlərini, düşüncələrini ictimaiyyətlə bölüşən insandır. Özü də bunu qısa bir zamanda etmək mümkündür. Qəzetə verdiyin yazı ən tez bir gün sonra oxuculara çatır, onların reaksiyasını dərhal öyrənə bilmirsən. Bloqlarda isə texnologiyanın verdiyi imkanlar daha genişdir".

Bloqların verdiyi imkanların günü-gündən artdığını deyən müsahibim videobloqları dediklərinə misal çəkir. Yəni artıq hər bloqçu informasiyanı video vasitəsilə oxucularına çatdıra bilir: "İndi hər kəs başa düşür ki, internet oxucusunun vaxtı çox məhduddur və informasiyanı qısa zamanda və aydın bir dildə oxucuya çatdırmaq lazımdır. Bir dəqiqəlik videoblok və altından şərhlər - bu şəkildə informasiya mübadiləsi daha səmərəlidir. Çünki dövr bunu tələb edir.

A.Nəzərovun sözlərinə görə, artıq toplantı ilə bağlı təşkilati məsələlər yekunlaşmaq üzrədir. Forumda 100-ə yaxın iştirakçının olacağı gözlənilir. Forumun anonsunu daha geniş dairələrə yaymaq məqsədilə toplantıya dair maraqlı ssenarisi olan video çarxlar hazırlanıb. Proqrama əsasən, iştirakçıların özləri müzakirə etmək istədikləri məsələləri müəyyənləşdirib sonra diskussiyalar aparacaqlar.