Milli Məclisin beş illik fəaliyyəti dövründə parlament müstəvisində iqtidar-müxalifət münasibətləri normal səviyyədə keçib. Bu barədə vitse-spiker jurnalistlə söhbətdə bildirib.
"Hər halda ötən dövrlərdəki hay-küylü müzakirələrin, bəzi digər hərəkətlərin də qoşulduğu diskussiyaların şahidi olmadıq. Hər kəsin öz fikrini azad şəkildə ifadə etmə imkanını müşahidə etdik. Eyni zamanda parlamentdə olan azlığın fikirləri də eşidildi. Əsas odur ki, biz fəaliyyət sahələri üzrə iqtidar-müxalifətə fərq qoymadan hər kəsin iştirakının təmin olunmasına çalışdıq", - deyən Bahar Muradova bildirib ki, kimlərin bu tribunadan necə istifadə etməsi artıq onların öz işləridir. Milli Məclisin beş illik fəaliyyətinə toxunan vitse-spiker qeyd edib ki, parlamentin işinə kənardan qiymət olmalıdır. "Bunu Azərbaycan xalqı, seçiciləri, mediası deyə bilər. Mən özüm-özümə konkret rəqəmlə qiymət vermək istəməzdim".
Bununla yanaşı Muradova qeyd edib ki, parlament beş il ərzində qarşısına qoyduğu məqsədə nail olub. "Biz bu müddət ərzində ölkə qanunvericiliyinin təkmilləşdirilməsi istiqamətində çox ciddi addımlar atdıq. Həmçinin parlamentin cəmiyyətdə rolunun artırılması istiqamətində ciddi uğurlara imza atdıq. Milli Məclisin beynəlxalq əlaqələrini ciddi şəkildə genişləndirə bildik", - deyən Bahar Muradova bu illərin səmərəli keçdiyini bildirib.
|
