"Beynəlxalq təşkilatlarda Azərbaycanın işğal olunmuş torpaqları ilə bağlı sənədlərin müzakirəyə çıxarılması çox vacib və əhəmiyyətlidir. Ona görə ki, dünya ictimaiyyəti Ermənistanın Azərbaycana qarşı təcavüzü haqda geniş məlumat əldə edir".

Bu fikirləri Yeni Azərbaycan Partiyasının rəsmi saytına açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Azərbaycanın işğal olunmuş ərazilərinə dair məsələnin BMT Baş Assambleyasında müzakirəyə çıxarılmasına münasibət bildirərkən deyib.

Səməd Seyidov qeyd edib ki, dünya ictimaiyyəti bu məlumatları əldə etdikdən sonra işğal faktına münasibət bildirməlidir:

"Bu məsələnin nüfuzlu beynəlxalq təşkilatlarda müzakirə edilməsi, bunun əsasında hansısa bir sənədin qəbulu öz-özlüyündə Dağlıq Qarabağ probleminin həlli istiqamətində görülən işlər üçün çox böyük əhəmiyyət kəsb edir".

Komitə sədri artıq Ermənistanın təşvişə düşdüyünü də vurğulayıb: "Çünki BMT müstəvisində müzakirəyə çıxarılan bu məsələ Ermənistanı işğalçı kimi tanıtmaqla yanaşı Azərbaycanın diplomatik uğurudur. Məsələnin BMT müstəvisinə çıxarılması ilə bağlı Ermənistanda ciddi narahatlıq var. Onlar da çox gözəl başa düşürlər ki, bu sənədin qəbulu işğalçı dövlətin mövqeyini daha da zəiflədəcək. Bütün hallarda, bu sənəd vacibdir, əhəmiyyətlidir və nə qədər çox ölkə Azərbaycanın mövqeyini dəstəkləsə, bir o qədər yaxşıdır".

Yeri gəlmişkən, sentyabrın 23-də Türkiyə prezidentinin sədrliyi ilə BMT Təhlükəsizlik Şurasına üzv ölkələrin hökumət və dövlət başçılarının sammiti keçiriləcək. APA-nın məlumatına görə, bu barədə Türkiyənin BMT-dəki daimi nümayəndəliyinin rəhbəri Ərtoğrul Apakan bildirib. Sammit BMT Təhlükəsizlik Şurasının öz qarşısına qoyduğu əsas hədəfin - sülh və beynəlxalq təhlükəsizliyin bərqərar olması məqsədinin həyata keçirilməsi imkanlarının möhkəmləndirilməsinə həsr olunacaq. TŞ üzvləri preventiv diplomatiya, sülhpərvərlik və postmünaqişə dövründə sülh quruculuğu səylərinə xüsusi diqqət yetirəcəklər. Təhlükəsizlik Şurasının sonuncu analoji sammiti 2000-ci ildə keçirilib. Ərtoğrul Apakan qeyd edib ki, Təhlükəsizlik Şurası üzvlərinin əksəriyyəti prezident və baş nazir səviyyəsində təmsil olunacaq. BMT Təhlükəsizlik Şurasının sentyabr ayındakı gündəliyinə gəldikdə daimi nümayəndəliyin rəhbəri bildirib ki, bu ay Nepal, Əfqanıstan, Liberiya və Syerra-Leonedə vəziyyət müzakirə olunacaq, Yaxın Şərqdə vəziyyətə dair ənənəvi brifinq keçiriləcək.

Təhlükəsizlik Şurası sanksiyalar üzrə komitənin İranla bağlı hesabatını da dinləyəcək. Xatırladaq ki, bu aydan etibarən BMT Təhlükəsizlik Şurasında sədrlik Türkiyəyə keçib.