Əməkdar artist Cavanşir Məmmədovun "Ayna"ya bildirdiyinə görə, bu gün toy bazarında aşağı qiymətə, eyni zamanda, sanballı toy aparan onun başçılıq etdiyi komandadır. Bütöv bir toydan 3000 manat aldıqlarını etiraf edən Cavanşir Məmmədov bu vəsaitdən ona yalnız 200 manat çatdığını söylədi. Onun əlavəsinə görə, toyda onları 16 nəfərdən ibarət musiqiçi qrupu müşayiət edir, eyni zamanda, bu kampaniyaya bir şoumen və "M life" qrupunun qızları daxildir. Bundan əlavə, həmin məbləğdən əməkdar artist Firuzə İbadovanın da payına düşür:
"3000 manatı bu qədər insana böləndə əsas ifaçılara çox cüzi məbləğ qalır. Amma mən bu qazanca qane oluram. Çünki övladının toyunda bizi görmək istəyən valideynlərin hamısı eyni təbəqədən deyil. Bunların arasında kasıbları da olur. Bəzən onların büdcəsini nəzərə alıb özüm pulsuz oxumuşam. Bu sözləri danışmağım şənimə təriflər söylədiyim kimi başa düşülməsin. Sözümün məqsədi toy bazarını həqiqətən də bazara çevirənlər barədədir. Bir toyu 5000-6000 manata oxuyurlur. Valideyn övladından keçə bilməyib, həmin pulu birtəhər tapıb müğənniyə verir. Bəzi müğənnilər süni şəkildə qiymətləri artırırlar. Oxumaqları da bir şey deyil. Ancaq reklamları var. Son illər də fonoqram dəbə düşüb və boğazlarına əziyyət vermirlər".
Sənətdəki strategiyasını dəyişmək fikrində olmayan Cavanşir Məmmədov, eyni zamanda, özünü ən yüksək vergi ödəyən sənətçilərdən biri adlandırdı. Müğənni əvvəlcə qeyd etdi ki, avqust, yanvar, may aylarında, eyni zamanda, müqəddəs günlərdə toy olmur. İlin 6, yaxud 7 ayını toyda, qalan günlərini işsiz keçirdiyini deyən Cavanşir müəllim, buna baxmayaraq, dövlətə olan haqqını vaxtlı-vaxtında ödədiyini söylədi.
|
