İran - Azərbaycan - Rusiya marşrutunda narkotik vasitələrin daşınmasında təqsirli bilinən mütəşəkkil dəstənin indiyə qədər istintaqdan yayınan üzvü məhkəmə qarşısında dayanıb və ona hökm oxunub. APA-nın xəbərinə görə, proses Ağır Cinayətlərə dair İşlər üzrə Məhkəmədə hakim Hüseyn Əliyevin sədrliyi ilə keçib. Daşqın Cavadovun (1971) cinayət əməli sübuta yetirilib və 10 il müddətinə azadlıqdan məhrum edilib.
Cəlilabad rayon sakini Daşqın Cavadov Şirvan şəhər sakinləri - Çingiz Əliyev (1968) və Royam Əliyev (1985) qardaşları, Yusif Qaraxanov (1952), Yardımlı rayon sakini Rafiq Tağıyev (1959), Şirvan şəhərində anadan olmuş, Bakıda müvəqqəti məskunlaşmış Bəxtiyar Hüseynov (1968), eləcə də hazırda İranın şəxsiyyətləri istintaqla müəyyənləşdirilən vətəndaşları və qeyriləri öncədən əlbir olub cinayət əlaqəsinə girərək, külli miqdarda narkotik vasitəni satış üçün qaçaqmalçılıq yolu ilə İrandan Azərbaycana gətiriblər.
Daha sonra narkotik vasitə Şimali Qafqazdakı Pyatiqorsk şəhərinə göndərilib. Lakin keçirilən əməliyyat tədbirləri nəticəsində növbəti narkotik yükünü Pyatiqorska çatdırmaları mümkün olmayıb. Mütəşəkkil dəstənin üzvləri yaxalanıblar. Yaxalandıqları zaman onlara məxsus avtomaşından ümumi çəkisi 67 kq 414 qr olan narkotik vasitə götürülmüşdür.
Onlar CM-in 206 (qaçaqmalçılıq) və 234-cü (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə mühakimə olunublar.
Daşqın Cavadov dəstə üzvləri tutulan zaman istintaqdan yayına bilmişdi. Onu MTN əməkdaşları keçən il yaxalaya bilmişlər. Bu mütəşəkkil dəstənin üzvləri hələ 2008-ci ildə məhkəmə qarşısında dayanmış və müxtəlif müddətlərə azadlıqdan məhrum edilmişdilər.
|
